მოძრაობა ლელოს დამფუძნებელი, მამუკა ხაზარაძის შეფასებით, გიგი უგულავას დაკავება ბიძინა ივანიშვილის მხრიდან სასოწარკვეთილებაში ჩავარდნილი კაცის გადაწყვეტილებას ჰგავს. ამის შესახებ მან მთავარ არხთან საუბრისას განაცხადა.

"ის, რაც დღეს გაჟღერდა ივანიშვილის პირადი ადვოკატის, პირადი პროკურორის გამოტანილი სასჯელი რომელიც ახლა უკვე მოსამართლის ამპლუაში შეასრულა არის აბსოლუტურად ამოვარდნილი ყველა სამართლებრივი ჩარჩოდან. ეს არის მე მგონი უკვე სასოწარკვეთილებაში ჩავარდნილი კაცის მოქმედება, ბიძინა ივანიშვილი მყავს მხედველობაში, შესაბამისად ნებისმიერი გადაწყვეტილება, რომელსაც მიიღებს ჩვენი უსამართლო სასამართლო იქნება ძალიან სერიოზულად გაპროტესტებული. მე ვფიქრობ, რომ ეს პოლიტიკა არსად არ მიიყვანს მას", — თქვა მამუკა ხაზარაძემ.

მამუკა ხაზარაძე არ გამორიცხავს, რომ შემდეგი ვინც შეიძლება "სამიზნე" იყოს თვითონაა, თუმცა ისინი ბრძოლას არ შეწყვეტენ.

თბილისის ყოფილ მერსა და ოპოზიციის ერთ-ერთ ლიდერს, გიგი უგულავას პატიმრობაში ყოფნა ისევ 3 წლით, 2 თვითა და 8 დღით მოუწევს. საქმეზე, რომელზეც უგულავა რამდენიმე წლის წინ მსჯავრდებული იყო, გადაწყვეტილება უზენაესმა სასამართლომ დღეს, 10 თებერვალს გამოაცხადა. საკასაციო საჩივარი ყოფილმა გენერალურმა პროკურორმა და ახლადარჩეულმა მოსამართლემ შალვა თადუმაძემ განიხილა. მასთან ერთად შემადგენლობაში იყვნენ მოსამართლეები, მერაბ გაბინაშვილი და გიორგი შავლიაშვილი.

საქმე ეხება თბილისის განვითარების ფონდის საქმეს, რაზეც გიგი უგულავა და მასთან ერთად ბრალდებული 4 პირი 2018 წლის თებერვალში დამნაშავედ სცეს. გიგი უგულავას პროკურატურა მერობის პერიოდში თბილისის განვითარების ფონდიდან 48 მილიონი ლარის მითვისება-გაფლანგვას ედავება.

2018 წლის თებერვალში თბილისის საქალაქო სასამართლომ თბილისის ყოფილი მერი გიგი უგულავა და მასთან ერთად ბრალდებული ოთხი პირი, ე.წ. ფონდების საქმეში დამნაშავედ ცნო. უგულავას მიუსაჯეს 1 წლითა და 3 თვით თავისუფლების აღკვეთა, თუმცა სხვა საქმეზე გამოტანილმა განაჩენმა ახალი განაჩენი შთანთქა. მას სასჯელი მოხდილად ჩაეთვალა.

ბრალდების მხარე ამტკიცებდა, რომ თბილისის მერმა და ერთიანი ნაციონალური მოძრაობის თბილისის საქალაქო ორგანიზაციის თავმჯდომარემ, გიგი უგულავამ მერიის სხვა მაღალჩინოსნებთან ერთად, შეიმუშავა დანაშაულებრივი სქემა: "თბილისის განვითარების ფონდის კუთვნილი თანხით 2012 წლის ოქტომბრის საპარლამენტო არჩევნებთან დაკავშირებული ერთიანი ნაციონალური მოძრაობის წინასაარჩევნო ხარჯების დასაფინანსებლად".