ეკონომიკის მინისტრის, ნათია თურნავას ინფორმაციით, მთავრობამ ქუთაისის საერთაშორისო აეროპორტისა და საქართველოს რკინიგზის დამაკავშირებელი პროექტი დაამტკიცა. მისი განმარტებით, ამოქმედდება კოპიტნარის რკინიგზის სადგური, სადაც თბილისიდან მატარებლით ჩასვლა იქნება შესაძლებელი, სადგურიდან კი მგზავრები სპეციალური შატლებით შეძლებენ აეროპორტამდე მისვლას.

მინისტრის თქმით, პროექტში სამი უწყებაა ჩართული. კერძოდ, საქართველოს რკინიგზა კოპიტნარის სადგურის რეაბილიტაციას დაიწყებს, საგზაო დეპარტამენტი სადგურისა და აეროპორტის დამაკავშირებელ გზის, აეროპორტების გაერთიანება კი ავიამგზავრების შატლებით უფასო მომსახურებას უზრუნველყოფს.

მინისტრის თქმით, სადგურიდან აეროპორტამდე გზის მონაკვეთი 1,5 კმ არის და მგზავრებს შატლები პერიოდულად მოემსახურებიან.

ეს პირველი შემთხვევა არ არის, როდესაც მთავრობა ქუთაისის აეროპორტთან რკინიგზით დაკავშირების პირობას დებს. 2017-წელს მაშინდელმა პრემიერ-მინისტრმა, გიორგი კვირიკაშვილმა კოპიტნარში რკინიგზის სადგურის გახსნა დააანონსა. მან წამზომიც კი ჩართო და აღნიშნა, რომ ზუსტად ერთ წელში ეს სადგური ამოქმედდებოდა, თუმცა პროექტი არ შედგა.