ქართულო ოცნების ლიდერი, მამუკა მდინარაძე ამბობს, რომ შეუძლებელია სადმე ეწეროს, რომ ე.წ. გერმანული საარჩევნო მოდელი კონსტიტუციასთან შესაბამისობაშია. ასე უპასუხა მან ევროპული საქრთველოს მიერ, ცოტა ხნის წინ გავრცელებულ ინფორმაციას, რომ ეუთო/ოდირის დასკვნით, ეს მოდელი კონსტიტუციურია.

"მთელ ქართულ საზოგადოებას აინტერესებს, გაგზავნილი იყო თუ არა გერმანული მოდელი ეუთო/ოდირში და ეუთო/ოდირი ამბობს, თუ არა, რომ გერმანული მოდელი არის კონსტიტუციასთან შესაბამისობაში, ასეთი წინადადება მათ ვერ თქვეს. ახლა სიტყვების მანიპულირებით ცდილობენ, რომ საქართველოს და ქართულ საზოგადოებას დააჯერონ, რომ გერმანული მოდელი, რომელზეც ლაპარაკობდნენ თვეების განმავლობაში, არის კონსტიტუციასთან შესაბამისობაში. შეუძლებელია, რომ ეს სადმე ეწეროს, ასეთ რამეს ვერავინ ვერ დაწერდა და თვეების განმავლობაში კამათი იყო სწორედ ამაზე, ეს არის ტყუილი, იგივეს ვიმეორებ დღესაც, რომ გერმანული მოდელის საქართველოს კონსტიტუციასთან შესაბამისობის დადგენა არის შეუძლებელი", — თქვა მამუკა მდინარაძემ.

მდინარაძის აზრით, ეუთო/ოდირის დასკვნის გაცნობის გარეშეც კარგად ჩანს, რომ ოპოზიცია აპირებს ახალი ტყუილი "მოახვიოს" საზოგადოებას. მან თქვა, რომ ამის უფლებას არ მისცემს და მმართველი გუნდი დასკვნას გაეცნობა და კომენტარს ხვალ, 6 თებერვალს გააკეთებს.

ცოტა ხნის წინ, ევროპული საქართველოს ლიდერმა, სერგი კაპანაძემ ბრიფინგი გამართა და თქვა, რომ ეუთო/ოდირისგან მიიღეს დასკვნა, რომლის მიხედვითაც ოპოზიციის შეთავაზებული ე.წ. გერმანული მოდელი კონსტიტუციასთან შესაბამისობაშია.

საარჩევნო სისტემის ცვლილების კანონპროეტქი 30-მდე ოპოზიციურმა პარტიამ პარლამენტში 4 დეკემბერს დაარეგისტრირა. მმართველი გუნდი მიიჩნევს, რომ ეს მოდელი შეუსაბამოა და მას მხარს არ უჭერს. მოლაპარაკებები ამ თემასთან დაკავშირებით საერთაშორისო პარტნიორების ინიციატივით ისევ გრძელდება. ე.წ. გერმანულ მოდელთან დაკავშირებით განცხადება არასამთავრობო ორგანიზაციებმაც გაავრცელეს, ისინი წერდნენ, რომ ეს მოდელი კონსტიტუციას არ ეწინააღმდეგება.