ოცნების დეპუტატი ნუკრი ქანთარია აცხადებს, რომ უმრავლესობის დღევანდელ სხდომაზე ოპოზიციის საპროტესტო აქციაც განიხილეს.

"რაც შეეხება გარეთ ნაციონალური მოძრაობის ჭიჭყინს, ამაზეც გვქონდა... რა ვუყოთ ამ ხალხს: შევწვათ, მოვხარშოთ? ნახევარი ესე, ნახევარი ისე... სად წავიდნენ.. მაგრამ ეს მათი საქმეა", — განუცხადა მან რუსთავი 2-ს.

დღეს, 5 თებერვალს, ოპოზიციის აქციის პარალელურად პარლამენტში უმრავლესობის სხდომა იმართებოდა. დეპუტატების თქმით, მიმდინარე პოლიტიკურ საკითხებს განიხილავდნენ და არჩევნებისთვის მზადება დაიწყეს.

საქართველოს პარლამენტთან ოპოზიციისა და აქტივისტების საპროტესტო აქცია "სირცხვილის კორიდორები" ბიუროს სხდომამდე დაიწყო. პროტესტის მონაწილეები ბანერებით და სასტვენებით იდგნენ და პარლამენტში შესულ დეპუტატებს ამ ფორმით დისკომფორტი უქმნიდნენ.

"სირცხვილია", "თავისუფლება პოლიტპატიმრებს", "ბიძინა ვირუსი" — ამ და სხვა პლაკატებით ისინი ორ სხვადასხვა შესასვლელთან, ჩიტაძისა და ჭიჭინაზის ქუჩაზე იდგნენ.