რამდენიმე კვირის წინ თბილისის ზოოპარკმა მოქალაქეებს გადასაგდებად გამზადებული ჩიჩილაკების მიტანა სთხოვა. დღეს კი უამრავი ფოტო გამოაქვეყნა იმის საჩვენებლად, თუ როგორ გამოიყენეს ქართული საახალწლო ატრიბუტი.

არც იფიქროთ, რომ გადაყარეს, ან გასათბობად კოცონი ააგიზგიზეს — ამის ნაცვლად ჩიჩილაკებით ზოოპარკის ბინადრებისთვის სხვადასხვა გასართობები და გამოწვევები შექმნეს, რადგან თავსატეხები ცხოველების კონსერვაციის პირობებში ძალიან მნიშვნელოვანია

ფოტო: თბილისის ზოოპარკი

"ამ აქტივობებს გარემოს გამდიდრებას ეძახიან. თანამედროვე ზოოპარკებში ეს ისეთივე რუტინული საქმეა, როგორც ცხოველის კვება, წყლის გამოცვლა და ვოლიერის დალაგება. ხშირად დამთვალიერებლები ხეზე მოკონწიალე ხორცს, ან ბოსტნეულს რომ დაინახავენ, კოპებშეყრილნი გვსაყვედურობენ, ცხოველებს რატომ აწვალებთ, არ შეიძლება პირდაპირ აჭამოთო? ცივილურადო. ადამიანურადო. არა, ბატონო. არ შეიძლება. გარეული ცხოველებისთვის საკვების ლანგრით მირთმევა სულაც არაა სასარგებლო. პირიქით. გარემოს გასამდიდრებელი ღონისძიებებიც სწორედ იმას ემსახურება, რომ ცხოველმა ბუნებრივი ქცევები გამოავლინოს — ეძებოს და მოიპოვოს საკვები, ისწავლოს ხეზე ცოცვა, აიშენოს ბუნაგი, ან ბუდე და ა.შ.", — წერს ზოოპარკი ფეისბუქზე.

როგორც აღმოჩნდა, ვიზიტორების მიერ მიტანილი ჩიჩილაკებით ფაფრიანი ცხვრები, მაკაკები და მარტორქები კარგად გაერთნენ, თუმცა განსაკუთრებით მოილხინეს ქართველმა დათვებმა:

ფოტო: თბილისის ზოოპარკი

ფოტო: თბილისის ზოოპარკი

"ცას სწვდებოდა მათი კრიმანჭული და ხასანბეგურა, მაგრამ ზრიალი კი გაუდიოდა მიწას. მოვუკაზმეთ გაფუებული ჩიჩილაკები ლოყაწითელი ვაშლებით, სტაფილოებითა და ბუთქუნა სკუმბრიებით და შევუბრძანეთ დიდი ზარ-ზეიმით. ზოგმა ხილ-თევზეული ჩამოგლიჯა, ზოგმა გაბრდღვნა და თავზე დაიყარა, ზოგმა გაფანტა და შიგ იკოტრიალა, ზოგმაც ბუნაგში გააქანა და სავარაუდოდ, თავქვეშ ამოიდო, ქე რომ ჩვენ ბუმბულის ბალიშს ამოვიდებდით, ისე".

თავად ნახეთ:

ფოტო: თბილისის ზოოპარკი

ფოტო: თბილისის ზოოპარკი

ფოტო: თბილისის ზოოპარკი

ფოტო: თბილისის ზოოპარკი

ფოტო: თბილისის ზოოპარკი

ფოტო: თბილისის ზოოპარკი

ფოტო: თბილისის ზოოპარკი

ზოოპარკი ყველას "სპილოსხელა მადლობას" უხდის ჩიჩილაკებისთვის და იმედს იტოვებს, რომ გამოუყენებელი, ბუნებრივი მასალით დამზადებული ნივთები ცხოველებისთვის არ დაგენანებათ.