საქართველოს ახალგაზრდა იურისტთა ასოციაციამ Reginfo-ს სახელით საკონსტიტუციო სასამართლოში ონლაინმედიისთვის არჩევნებამდე 48 საათის განმავლობაში საზოგადოებრივი კვლევის გამოქვეყნების აკრძალვა გაასაჩივრა. ორგანიზაციას მიაჩნია, რომ ტელევიზიებსა და ონლაინმედიაზე ერთი და იგივე წესები არ უნდა გავრცელდეს.

"მოსარჩელისათვის განსაკუთრებით პრობლემურია ონლაინ და ბეჭდური მედიის მიმართ კომუნიკაციების ეროვნული კომისიის მიერ სამართალდარღვევის ოქმის შედგენის უფლებამოსილების მინიჭება. კომუნიკაციების ეროვნული კომისიის ფუნქცია ყოველთვის სამაუწყებლო მედიის რეგულირება წარმოადგენდა, გასაჩივრებული ნორმებით გაფართოვდა ამ კომისიის უფლებამოსილება და მისი რეგულირების სფეროში მოეცა ბეჭდური და ინტერნეტმედიაც", — აღნიშნავენ საიაში.

როგორც რეგინფო იუწყება, მედიასაშუალებას ადმინისტრაციულ სამართალდარღვევათა ოქმი კომუნიკაციების კომისიამ 2019 წლის მაისში მასალის გამოქვეყნების გამო შეუდგინა.

საიას დასაბუთება

"აღსანიშნავია ის გარემოება, რომ ეს აკრძალვა არ ვრცელდება სოციალური ქსელის ინდივიდუალურ მომხმარებელზე, რომელმაც შეიძლება თავდაპირველად გამოაქვეყნოს ამგვარი საზოგადოებრივი აზრის კვლევა საკუთარ ფეისბუქ გვერდზე ან იმ მომხმარებელზე, რომელმაც ამგვარი სტატუსი გააზიაროს. თუკი საზოგადოებრივი აზრის კვლევის გამოქვეყნების აკრძალვის მიზანია, არ მოხდეს ამომრჩევლის ნებაზე მანიპულირება, ამგვარი მანიპულირება შეიძლება მოახდინოს ფეისბუქის ინდივიდუალურმა მომხმარებელმაც, თუმცა აკრძალვა მასზე არ ვრცელდება. ამგვარად, საიას მიაჩნია აკრძალვა არ არის ვარგისი საშუალება ლეგიტიმური მიზნის მისაღწევად და შესაბამისად, ეწინააღმდეგება მე-17 მუხლით აღიარებულ გამოხატვის თავისუფლებას.

ზოგადად, ინტერნეტი არის იდეათა თავისუფალი ბაზრის უნიკალური პლატფორმა. ინტერნეტი ყველა ადამიანს აძლევს შესაძლებლობას, თავისი აზრი მიიტანოს ფართო საზოგადოებამდე და ამით ჩართული იყოს საჯარო დისკუსიებში. ინტერნეტი თავის თავში გამორიცხავს ერთი ან რამდენიმე მსოფლმხედველობის თუ პოზიციის დომინირების შესაძლებლობას. ინტერნეტის მეშვეობით ყველას შეუძლია სახელმწიფოს დახმარების გარეშე, ყალბ ინფორმაციას დაუპირისპირდეს სწორი ინფორმაციით, ცილისწამების შემთხვევაში გამოიყენოს პასუხის უფლება. იმის გათვალისწინებით, რომ ინტერნეტი, მათ შორის სოციალური ქსელი, არის აზრის გამოთქმის საყოველთაო და იაფი საშუალება, განსხვავებით, სამაუწყებლო მედიისაგან, საქართველოს კონსტიტუციის მე-17 მუხლით აღიარებულ გამოხატვის და ინტერნეტის თავისუფლებას ეწინააღმდეგება, მედიის ამ სეგმენტის მოქცევა კომუნიკაციების ეროვნული კომისიის რეგულირების სფეროში. ინტერნეტსივრცეში დივერსიფიცირებული ინფორმაციის გავრცელების და მიღების შესაძლებლობას მინიმუმამდე დაჰყავს არჩევნების დღეს ამომრჩევლის ნებაზე მანიპულირების საფრთხე, რაც გამორიცხავს კომუნიკაციების ეროვნული კომისიის მიერ ინტერნეტის რეგულირების საჭიროებას".