ინგლისის ქალაქ შეფილდში მცხოვრებმა 30 წლის მარკ როუფმა გადაწყვიტა, რომ სიყვარულის საპოვნელად ერთი შეხედვით უჩვეულო გზისთვის მიემართა: მანჩესტერის ერთ-ერთ გზაზე არსებულ ბილბორდზე საკუთარი თავის რეკლამა განათავსა.

"შეხვდი მარკს — შესაძლოა ეს ისაა, რასაც ამდენ ხანს ელოდი" — ვკითხულობთ ბილბორდზე გაკრულ განცხადებაში, რომლის ავტორიც იმედოვნებს, რომ ამ გზით სასურველ პარტნიორ ქალს იპოვის.

მარკ როუფის განცხადებით, რეკლამის შემდეგ მას არაერთი მსურველი შეეხმიანა: "100-ზე მეტი ადამიანი დამიკავშირდა, თუმცა მათი ნახევარი, სამწუხაროდ, კაცია. ამის მიუხედავად, მაინც კმაყოფილი ვარ".

მისი თქმით, ეს იდეა მოულოდნელად და შემთხვევით მოაფიქრდა:

"როგორც ყველა კარგი იდეა, ესეც პაბში გაჩნდა: ჩემს მეგობარს ვუხსნიდი, თუ როგორ დავიტანჯე გაცნობითი აპლიკაციებით და სწორედ მაგ დროს ვიხუმრე, რომ ბილბორდზე უნდა გამეკრა საკუთარი ფოტო. თავიდან ბევრი ვიცინეთ, თუმცა შემდეგ მივხვდი, რომ ძალიანაც კარგი იდეა იყო", — ამბობს ის.

ბილბორდზე მითითებულია ვებგვერდის მისამართიც, სადაც მსურველებს შეუძლიათ მარკ როუფს დაუკავშირდნენ. ამავე ვებგვერდზე კანდიდატებს შეუძლიათ გაეცნონ მის აღწერილობასა და ფოტოებს.

ფოტო: MARK ROFE

მარკ როუფმა ბილბორდზე საკუთარი რეკლამის განსათავსებლად 425 ფუნტი სტერლინგი გადაიხადა, რაც, მისი თქმით, წარმატებული ნაბიჯი აღმოჩნდა, რადგან უკვე ბევრი ადამიანი დაუკავშირდა.

"შეიძლება ვინმემ იფიქროს, რომ გავგიჟდი, რადგან ამაში ამდენი ფული დავხარჯე, თუმცა თუ ასე სიყვარულს ვიპოვი, ეს საკმაოდ იაფი გამოდის".