ახალი კორონავირუსის გამო უკვე 427 ადამიანი გარდაიცვალა. გარდაცვალების პირველი შემთხვევა დაფიქსირდა ჩინეთის ადმინისტრაციულ რეგიონში, ჰონგ-კონგში. დაინფიცირებულთა რიცხვმა 20 ათასს გადააჭარბა.

CNN-ის ინფორმაციით, ჩინეთს გარეთ კორონავირუსის 185 შემთხვევა დაფიქსირდა 20-მდე ქვეყანაში და აქედან მხოლოდ ფილიპინებში გარდაიცვალა ერთი ადამიანი. გამოცემისვე ინფორმაციით, ჰონგ-კონგში გარდაცვლილი 39 წლის კაცი ერთი თვის წინ უხანში იყო გამგზავრებული.

მანამდე ჰონგ-კონგის საავადმყოფოს ასობით თანამშრომელი ჩინეთთან საზღვრის ჩაკეტვის მოთხოვნით გაიფიცა. მათი თქმით, ეს შეამცირებს ვირუსის გავრცელების რისკს.

მანამდე, ჰონგ-კონგმა შეაჩერა სარიკინიგზო და საზღვაო მომსახურება, თუმცა საავადმყოფოს პერსონალი ითხოვს, სრულად ჩაიკეტოს საზღვარი. ხელისუფლებაში აცხადებენ, რომ საზღვრის ჩაკეტვა ჯანდაცვის მსოფლიო ორგანიზაციის რეკომენდაციას ეწინააღმდეგება.

მსოფლიოს რიგმა ქვეყნებმა ჩინეთიდან ჩამსვლელი მგზავრებისთვის საზღვრები ჩაკეტა. აშშ-სა და ავსტრალიის ოფიციალურმა პირებმა განაცხადეს, რომ უცხო ქვეყნის მოქალაქეს, რომელიც ბოლო პერიოდში ჩინეთში იყო, ქვეყანაში არ შეუშვებენ. მანამდე, მსგავსი აკრძალვა დააწესა რუსეთმა, იაპონიამ, პაკისტანმა და იტალიამ.

მსოფლიო ჯანდაცვის ორგანიზაცია მსგავსი ზომების წინააღმდეგია და აცხადებს, რომ მოგზაურობის აკრძალვას მეტი ზიანის მოტანა შეუძლია, ვიდრე სიკეთის. მათი თქმით, ეს დააზიანებს ეკონომიკას და გაართულებს ინფორმაციის გაზიარებას. WHO-ს რეკომენდაციაა, დაიწყოს სამედიცინო სკრინინგი სასაზღვრო გამშვებ პუნქტებში, რადგან ქვეყნებში არალეგალურად შესვლით, საზღვრების ჩაკეტვა დააჩქარებს ვირუსის გავრცელებას. მოგზაურობის აკრძალვა გააკრიტიკა ჩინეთმაც. საგარეო საქმეთა მინისტრის პრესსპიკერის, ჰუა ჩუნინგის თქმით, ეს ნამდვილად არ არის კეთილი ნების ჟესტი.

საქართველოში დაავადებათა კონტროლის ეროვნული ცენტრის ხელმძღვანელი, ამირან გამყრელიძე ამბობს, რომ პანიკის საფუძველი არ არსებობს. მისი თქმით, საქართველო დაბალი რისკის ქვეყანაა და ამ ეტაპზე კორონავირუსით ინფიცირებული ადამიანის არც ერთი შემთხვევა არ დაფიქსირებულა.

ჯანდაცვის მსოფლიო ორგანიზაციამ კორონავირუსის გამო საერთაშორისო საგანგებო მდგომარეობა გამოაცხადა. ბრიფინგზე ორგანიზაციის წარმომადგენლებმა განაცხადეს, რომ ვირუსი კვლავ განაგრძობს გავრცელებას, საგანგებო რეჟიმის გამოცხადების მთავარ მიზეზად კი იმ ქვეყნების დაცვა დასახელდა, რომლებიც შეიძლება კორონავირუსთან გამკლავება თავად ვერ შეძლონ.