ჯანდაცვის სამინისტროს ინფორმაციით, კორონავირუსზე თბილისის საერთაშორისო აეროპორტში პირველი მგზავრები უკვე შეამოწმეს.

"ეპიდემიოლოგების ჯგუფს საგანგებო სიტუაციების კოორდინაციისა და გადაუდებელი დახმარების ცენტრის ეკიპაჟებიც შუერთდნენ. ადგილზე მედიკოსები მგზავრებს, როგორც დისტანციური თერმომეტრებით, ისე პირადი გასაუბრებით ამოწმებენ. მათ ასევე მიეწოდებათ ინფორმაცია ვირუსის სიმპტომურ მახასიათებლებთან დაკავშირებით", — ნათქვამია სამინისტროს განცხადებაში.

სამინისტროში ამბობენ, რომ საქართველო ვირუსის გავრცელების მხრივ დაბალი რისკის ქვეშ მყოფ ქვეყნებს შორისაა. უწყებამ მგზავრების შესამოწმებლად სპეციალური ზომები დღეს, 25 იანვარს მიიღო.

ახალი ვირუსი, ცნობილი როგორც 2019-nCoV, პირველად ქალაქ უხანში, დეკემბრის ბოლოს დაფიქსირდა. დაავადების გავრცელების რისკის გამო, მსოფლიოს ზოგიერთი ქვეყნის აეროპორტებში უხანიდან მიმავალი ტურისტებს სკრინინგს უკეთებენ, ზოგიერთი ქალაქიდან კი ფრენები დროებით გაუქმდა.

ამერიკის ჯანდაცვის ეროვნულ ინსტიტუტში (NIH) მკვლევართა ჯგუფმა უხანის ვირუსის ვაქცინაზე მუშაობა დაიწყო. ვარაუდობენ, რომ სამ თვეში პირველ ექსპერიმენტულ ვაქცინას გამოცდიან.

გაიგეთ მეტი: