"ლუნას სიკვდილით სიცოცხლისათვის!" — კვირას, 26 იანვარს თბილისის მერიასთან აქცია დაიგეგმა ცხოველთა მუნიციპალური თავშესაფრის დირექტორისა და კურატორის გათავისუფლების მოთხოვნით. აქციის ორგანიზატორია ცხოველთა გადარჩენის სახალხო ფრონტი. მოქალაქეები მერიის ცხოველთა მონიტორინგის სამსახურს "მიკედლებული ჯანმრთელი ძაღლის" ევთანაზიაში ადანაშაულებენ, თავად უწყება კი აცხადებს, რომ ცხოველის დაძინება აუცილებელი იყო.

საქმე ეხება 17 იანვარს მომხდარ ფაქტს, რა დროსაც ერთ-ერთი კერძო კლინიკის წარმომადგენლებმა ცხოველთა თავშესაფარს დაშავებული ძაღლის შესახებ აცნობეს, მერიის მონიტორინგის სამსახურმა კი ცხოველის ნახვის შემდეგ მისი ევთანაზია გადაწყვიტა.

"არ მოიძიეს ბირკის ნომერით პატრონი და დიდი ალბათობით არც ანალიზები და კვლევა ჩაუტარეს ისე დააძინეს. როცა ვიპოვეთ უკვე გვიანი იყო. მთელი შრომა, სიყვარული და ზრუნვა ერთი ხელის მოსმით გაანადგურეს თავიანთი სიბნელისა და უმეცრების დამსახურებით. დარღვეულია ძალიან ბევრი რამ პასუხს კი არავინ არ გვცემს", — აცხადებენ აქციის ორგანიზატორები.

მათი განცხადებით, ცხოველთა მონიტორინგის სამსახურს შეხვდნენ, თუმცა საპასუხო ბრალდებები მიიღეს ძაღლის გაუფორმებლობაზე. მათივე თქმით, პატრონს ოფიციალურად კიდევ 10 დღე ჰქონდა გასაფორმებლად.

მონიტორინგის სამსახურის მიერ On.ge-სთვის მიწოდებულ განმარტებით წერილში წერია, რომ ცხოველის უკიდურესად მძიმე მდგომარეობის გათვალისწინებით, "რომელიც განიცდიდა ტანჯვას", სააგენტომ მიიღო ევთანაზიის გადაწყვეტილება:

"სოციალურ ქსელში გამოქვეყნებული განცხადებები, თითქოს ძაღლს ჰყავდა პატრონი, ან მიმკედლებელი, სიმართლეს არ შეესაბამება. ასევე, სიმართლეს არ შეესაბამება ის გარემოება, რომ ძაღლი იყო ჯანმრთელი. ცხოველის უკიდურესად მძიმე მდგომარეობისა და მეპატრონის არარსებობის პირობებში, მის შესახებ ინფორმაციის დაკარგულის სტატუსით გამოქვეყნება და შემდეგ, კანონით განსაზღვრული ვადით დალოდება, არაგონივრული და არაჰუმანური იქნებოდა".

მოქალაქეები, რომლებიც ძაღლის ევთანაზიას აპროტესტებენ, აცხადებენ, რომ ცხოველი 2019 წლის 14 თებერვალს კავთისხევში, კისტის ტყვიებით დაჭრილი იპოვეს. მოგვიანებით პატრონი გამოუჩნდა ანა ლორიას სახით. ძაღლი მის ეზოში ცხოვრობდა. აქციის ორგანიზატორების ცნობით, ანამ ძაღლი ლუნა აცრა, გაუკეთა კასტრაცია და მის გასაფორმებლად ემზადებოდა.