20-წლიანი კვლევის შემდეგ ამერიკელმა მეცნიერებმა კიდევ ერთი წარმატებული ნაბიჯი გადადგეს არასასურველი ორსულობის წინააღმდეგ. კონტრაცეპტივი ანუ ჰორმონალური მედიკამენტები მამაკაცებისთვის ჯანმრთელობისთვის უსაფრთხო და ეფექტური გამოდგა.

BBC-ს ინფორმაციით, მეცნიერებმა კვლევა 270 მამაკაცზე ჩაატარეს და დაადასტურეს, რომ ჰორმონი ჯანმრთელობისთვის უსაფრთხოა და 96-პროცენტიანი ეფექტურობა ახასიათებს. თუმცა გამოყენებისას გვერდითი მოვლენებიც დაფიქსირდა.

კვლევის მიზანი სპერმის ეფექტურობის დასაქვეითებლად ისეთი პრეპარატის შექმნა იყო, რომელიც ორგანიზმისთვის უსაფრთხო იქნებოდა.

კვლევისას მეცნიერებმა სცადეს 1 მილილიტრ სპერმაზე სპერმატოზოიდების რაოდენობა 15 მილიონიდან 1 მილიონამდე შეემცირებინათ. კვლევის ობიექტად 18-დან 45 წლამდე მამაკაცები შეარჩიეს, რომელთაც მონოგამიური ურთიერთობა პარტნიორთან მინიმუმ ერთი წლის განმავლობაში ჰქონდათ. საკვლევ ობიექტებს ყოველ კვირაში ორ ჰორმონს, ტესტესტერონსა და პროგესტერონს აწვდიდნენ. 6 თვის განმავლობაში მათი სპერმატოზოიდების რაოდენობა 1 მილიონამდე შემცირდა.

კვლევის დასრულების შემდეგ მეცნიერებმა შეწყვიტეს საკვლევი ობიექტებისთვის კონტრაცეპტივის მიცემა და აკვირდებოდნენ, დაუბრუნდებოდა თუ არა ორგანიზმი ჩვეულ მდგომარეობას. კვლევის დასრულებიდან 1 წლის შემდეგ 8 მამაკაცის ორგანიზმში სპერმატოზოიდების რაოდენობა ნორმას არ დაუბრუნდა.

კვლევის ავტორის, ჯანდაცვის მსოფლიო ორგანიზაციის წარმომადგენლის დოქტორ მარიო ფესტინის განცხადებით, კვლევამ დაამტკიცა, რომ მამაკაცების კონტრაცეპტივი ეფექტურია და ამცირებს დაორსულების რისკს მათ პარტნიორებს შორის.

მიუხედავად ამისა, 2011 წელს გვერდითი მოვლენების გამო მეცნიერებს კვლევის შეჩერება მოუწიათ. გვერდითი ეფექტები კუნთების ტკივილებთან და აკნესთან ერთად დეპრესიის სახით გამოვლინდა.

შეფილდის უნივერსიტეტის ანდროლოგიის პროფესორმა ალან პეისმა მამაკაცების კონტრაცეპტივების შეფასებისას განაცხადა, რომ მიუხედავად გვერდითი მოვლენების არსებობისა, ამ კვლევამ მნიშვნელოვანი შედეგი აჩვენა:

"ყველა პრეპარატი, რომელიც დღემდე შეიქმნა და გამოიცადა, უსარგებლო აღმოჩნდა და ბაზარზე ვერ გამოვიდა, თუმცა ამ კონტრაცეპტივის ხელმეორედ გამოყენების სურვილი გამოხატა საკვლევი ობიექტების 75 პროცენტმა. კონტრაცეპტივი უდავოდ ეფექტური აღმოჩნდა და იმედები გაამართლა".

მეცნიერები კვლევას ეფექტურად და შედეგიანად მიიჩნევენ, თუმცა უახლოეს მომავალში მამაკაცების კონტრაცეპტივს აფთიაქებში ვერ ვიხილავთ.