ომბუდსმენი ნინო ლომჯარია ციხეში გადაღებული კადრების რამდენიმე თვით დაარქივებისა და გასაჯაროების გამო იუსტიციის მინისტრს, თეა წულუკიანს სახელმწიფო ინსპექტორის აპარატში უჩივლებს. ამის შესახებ ინფორმაცია On.ge-ს სახალხო დამცველის სამსახურიდან მიაწოდეს.

თეა წულუკიანმა ციხის მონიტორინგის კადრები პარლამენტში მოსმენის დროს გაასაჯაროვა. არასამთავრობო ორგანიზაციებმა ეს ფაქტი კანონისა და საერთაშორისო ვალდებულებების დარღვევად შეაფასეს. მათი განცხადებით, იუსტიციის მინისტრის ეს ქმედება მისი პოლიტიკური პასუხისმგებლობის დაყენების საფუძველი უნდა გახდეს.

იუსტიციის მინისტრმა, თეა წულუკიანმა სახალხო დამცველის კრიტიკას პენიტენციურ სისტემასთან დაკავშირებით რეკომენდაციებით უპასუხა. მან თქვა, რომ ომბუდსმენი პენიტენციურ დაწესებულებებში თავად არ დადის და ანგარიშს ამზადებს ისეთ თანამშრომლებზე დაყრდნობით, რომლებიც "ვითომ მონიტორინგს" ატარებენ.