ევროპული საქართველოს დეპუტატი ელენე ხოშტარია აცხადებს, რომ თბილისის მერიის მიერ პარლამენტის წინ მწვანე ღობის აღმართვა და რეაბილიტაციის შესახებ განცხადება სასაცილოა. მისი თქმით, ეს საპროტესტო მუხტს ვერ შეაჩერებს და პირიქით, ასე ქუჩის გადაკეტვა უფრო მარტივი იქნება.

"პრაქტიკულად, გვეუბნებიან, რომ ოღონდ არ შეიკრიბოთ და აღმშენებლობას დავიწყებთ ამ ადგილასო... ეს მარტო არაადეკვატურობა კი არ არის, შეშინებულები არიან, რომ აქ აქცია არ იყოს.

რა თქმა უნდა, აქ აქცია იქნება. პირიქით ხელი შეუწყვეს გზის გადაკეტვას უფრო მარტივად. აქციები ამ ტერიტორიაზეც იქნება, ბიძინას სახლთანაც, მათ ტერიტორიაზეც, პიკეტიც იქნება", — განუცხადა მან მთავარ არხს.

მწვანე ღობე პარლამენტის წინ მას შემდეგ დაიდგა, რაც გუშინ, 21 იანვარს საახალწლო ატრაქციონები აიღეს, რომლებიც 2019 წლის 31 დეკემბერს აქტივისტებთან დაპირისპირებისა და დაკავებების ფონზე დაიდგა. დღეს თბილისის მერმა, კახა კალაძემ განაცხადა, რომ პარლამენტის წინ, იქ, სადაც მალხაზ მაჩალიკაშვილის კარავი იდგა, სარეაბილიტაციო სამუშაოების დაწყება გადაწყვიტეს.

მაჩალიკაშვილი ამბობს, რომ მისი პროტესტი იქ მაინც გაგრძელდება და "კარვებიც დაიდგმება და ბანერიც".

"ჯებირი კი არა ჩინური კედელი რომ აღმართონ, ჩემი პროტესტი იქ გაგრძელდება, მე ამათ დავანგრევ, მე ამათ დავამთავრებ გახარიას თქმის არ იყოს. კარვებიც დაიდგმება და ბანერიც დაიდგმევა", — ამბობს მაჩალიკაშვილი, რომელიც მესამე ზამთარია პარლამენტთან შვილის მკვლელობის მიზეზების დადგენას მოითხოვს.

პარლამენტის წინა ტერიტორია თბილისი მერიამ 30 დეკემბერს, ღამით მორეცხა. კარვების აყრისა და ტერიტორიის გაწმენდის შემდეგ მერიამ აქ საახალწლო ატრაქციონები დაამონტაჟა. 31 დეკემბერს პოლიციელებსა და აქტივისტებს შორის დაპირისპირებისას სამართალდამცავებმა ძალით გაიყვანეს #სირცხვილიას აქტივისტები და ჯამში 9 პირი დააკავეს.

მერიამ პარლამენტის შენობის წინ შადრევნის გარემონტებისთვის ტენდერი რამდენჯერმე გამოაცხადა. 2018 წელს მომზადებული სატენდერო პირობების მიხედვით პროექტის ღირებულება 19 706 ლარი იყო. საპროექტო ობიექტის აღწერაში მითითებული იყო, რომ პარლამენტის შენობის წინ მოედანზე, განთავსებულია შადრევანი, რომლის სატუმბი სადგური მდებარეობს მიწის ქვეშ. ატმოსფერული ნალექების მოსვლის დროს კი წყალი ჟონავს, რაც საფრთხეს უქმნის და აზიანებს მიწისქვეშ განთავსებულ სატუმბ სადგურს.