თავისუფალი დემოკრატების ყოფილმა წევრებმა საგანგებო ბრიფინგი გამართეს.

ბრიფინგზე ზურაბ აბაშიძემ აღნიშნა, რომ ისინი არც ოპოზიციური და არც სამთავრობო გუნდის წარმომადგენლები არ არიან:

"ჩვენ აღარა ვართ თავისუფალი დემოკრატების პარტიის წევრები, აქედან გამომდინარე აღარ ვსაქმიანობთ პარტიულად, ბუნებრივია. ამიტომ აღარ ვართ ოპოზიციაში და არ ვართ ხელისუფლებაში, ესეც მინდა მკაფიო და ნათელი იყოს ყველასთვის. არანაირი შემოთავაზებები და არანაირი მოლაპარაკებები ამ მიმართულებით არ მიმდინარეობს არავისთან."

ზურაბ აბაშიძემ ისაუბრა საკონსტიტუციო უმრავლესობის საკითხზეც. მან აღნიშნა, რომ ქართულ სახელმწიფოს ამ მხრივ ცუდი გამოცდილება აქვს.

"გამოვთქვამ იმედს, რომ კვირიკაშვილის მთავრობის პირობებში, ეს საკითხი, თუ მოხდება საკონსტიტუციო უმრავლესობით გამარჯვება, არ იქნება ბოროტად გამოყენებული და იქნება მიმართული ქვეყნის და ქართული სახელმწიფოს აღმშენებლობისათვის."

ამავე ბრიფინგზე, თავისუფალი დემოკრატების ყოფილმა წევრმა დავით ონოფრიშვილმა მათ ამომრჩევლებს, არჩევნების მეორე ტურზე ქართული ოცნების მხარდაჭერისკენ მოუწოდა.