დედაენის ბაღში გარემოვაჭრეების მხარდასაჭერად სამოქალაქო აქტივისტები საშობაო ბაზრობას მართავენ. მოძრაობა სირცხვილიას წევრები ამბობენ, ამ ფორმით სამოქალაქო საზოგადოების მხარდაჭერას გამოხატავენ იმ ადამიანების მიმართ, რომლებმაც შვილმოკლულ მამას სოლიდარობა გამოუცხადეს.

სამოქალაქო აქტივისტები აპირებენ, რომ ნივთები გარემოვაჭრეებთან ერთად გაყიდონ, შექმნან საშობაო განწყობა და შემოსული თანხით მოვაჭრეებს დაეხმარნონ. ისინი საშობაო ბაზრობაზე იწვევენ სტარტაპერებსა და ხელნაკეთი ნივთების ავტორებს.

ფოტო: სირცხვილია

ფოტო: სირცხვილია

"გარემოვაჭრეები საკუთარ ოჯახებს საახალწლოდ გაყიდული ნივთების შემოსავლით არჩენენ. ბოლო სამი დღის განმავლობაში ამ ადამიანებმა მოქალაქეობრივი თვითშეგნებისა და სამოქალაქო სოლიდარობის უპრეცედენტო მაგალითი აჩვენეს. აუცილებელია მათ ვანახოთ, საქართველოს სამოქალაქო საზოგადოების უპირობო მხარდაჭერა და ვაგრძნობინოთ, რომ ჩვენ მათ გვერდით ვართ", — ამბობენ ორგანიზატორები.

2 იანვარს თბილისის მერიის მუნიციპალური სამსახურის წარმომადგენლებმა გარემოვაჭრეებს რესპუბლიკის მოედნის ტერიტორია დაატოვებინეს და პარლამენტის წინ განლაგებულ დახლებზე გადასვლა მოსთხოვეს. გარემოვაჭრეების ნაწილმა თქვა, რომ არ სურთ ვაჭრობა იქ, სადაც შვილმოკლული მამის საპროტესტო კარავი იდგა.

31 დეკემბრის ღამეს მერიამ შვილმოკლული მამის, მალხაზ მაჩალიკაშვილისა და პატიმრობაში მყოფი დეკანოზ მამალაძის ძმის კარვები აშალა და პარლამენტის წინ ზვიგენის გასაბერი ბატუტი დადგა. კარვების დაშლას ადგილზე დაპირისპირება მოჰყვა, შინაგან საქმეთა სამინისტრომ ღამით 9 აქტივისტი დააკავა.

მეორე დღესვე მერიამ ეს ბატუტი ვიზუალის გამო დაიწუნა, ჩაფუშა და მის ნაცვლად სხვა ატრაქციონები დადგა. ახალი წლის ღამეს მაჩალიკაშვილი, აქტივისტები და ოპოზიციის ლიდერები პარლამენტის წინ შეიკრიბნენ და მომხდარი გააპროტესტეს. ატრაქციონები, რომელიც ბავშვებისთვის იყო განკუთვნილი პოლიციას ჰქონდა შემოსაზღვრული ჯებირებითა და მანქანებით. დახლები კი, რომლებიც საახალწლო პროდუქციისთვის იყო განკუთვნილი, ცარიელი იდგა.