თბილისის საკრებულომ დედაქალაქის მერიის 2020 წლის ბიუჯეტი დაამტკიცა. მერის მოადგილის თქმით, ბიუჯეტის მოცულობა 1 მილიარდ 21 მილიონ 400 ათასი ლარია.

"ვფიქრობ 2020 წლის ბიუჯეტი არის განსაკუთრებული და მნიშვნელოვანი. ისტორიულ ნიშნულსაც კი აღწევს, ამხელა ბიუჯეტი დედაქალაქს არასდროს არ ჰქონია", — განაცხადა ქალაქის მერმა.

დღევანდელ სხდომას ოპოზიცია ბოიკოტს უცხადებდა. ისინი ბიუჯეტის არასწორ ხარჯვაზე საუბრობენ და აცხადებენ, რომ ამ პროტექტით ადმინისტრაციული ხარჯები და საშტატო ერთეულები იზრდება, რასაც კალაძე უარყოფს.

რა იგეგმება 2020 წლის ბიუჯეტით

ვიცე-მერის განცხადებით, 2020 წლის განმავლობაში ბიუჯეტის მოცულობა, გარდამავალი ნაშთის დამატების შემდეგ 1 მილიარდ 100 მლნ ლარს გადააჭარბებს, რაც ძირითადად გამოწვეულია შემოსავლების გადაჭარბებით. მისივე თქმით, ბიუჯეტს სესხებისა და გრანტების სახით დაემატება ჯამში დაახლოებით 320 მლნ ლარი.

ინფრასტრუქტურული პროექტებისთვის ბიუჯეტში გათვალისწინებულია 431 მლნ 90 370 ლარი, ხოლო სოციალური და ჯანდაცვის მიმართულებით გათვალისწინებულია 317 მლნ 593 121 ლარი.

ვიცე-მერის თქმით, ამ ბიუჯეტით იგეგმება ორბელიანის მოედანზე რამდენიმე მისამართის რეაბილიტაციის დასრულება; გუდიაშვილის მოედნის რეაბილიტაცია; ორბელიანის მოედნის მიმდებარედ, ჯორჯაძის, თაბუკაშვილისა და ფურცელაძის ქუჩების ნაწილის რეაბილიტაცია; მელიქიშვილის ქუჩაზე მდებარე ისტორიული ძეგლის სტატუსის მქონე ორი შენობის რეაბილიტაცია; მოსწავლე-ახალგაზრდობის ეროვნული სასახლის რეაბილიტაციის დაწყება; დედაენისა და 9 მარტის ბაღების სრული რეაბილიტაცია, რომლისთვისაც 17 მლნ ლარია გათვალისწინებული.

მისივე თქმით, ინფრასტრუქტურის განვითარების საქალაქო სამსახურის მიმართულებით, იგეგმება მუხრან მაჭავარიანის ქუჩისა და მარშალ გელოვანის გამზირის დამაკავშირებელი გზის მშენებლობის დასრულება; ილია ჭავჭავაძის გამზირის რეაბილიტაციის დასრულება; გლდანის რაიონში, ვეკუასა და ხიზანიშვილის ქუჩების რეაბილიტაციის დასრულება; ქეთევან წამებულის, აკაკი წერეთლისა და ვაჟა-ფშაველას გამზირების რეაბილიტაცია; უნივერსიტეტის მაღლივი კორპუსიდან წყნეთის გზატკეცილამდე არსებული ხიდის მშენებლობის დაწყება; ვეფხი და მოყმის ძეგლთან ახალი სატრანსპორტო კვანძის მშენებლობა.

გარდა ამისა, ხმალაძის თქმით, 2020 წლის ბიუჯეტის პროექტით, განათლების, სპორტისა და კულტურის მიმართულებით, დაგეგმილია ვარკეთილისა და დიდი დიღმის მულტიფუნქციური კომპლექსების მშენებლობის დასრულება; ლილოს დასახლებაში, სპორტული ცენტრის ტერიტორიაზე საცურაო აუზის მშენებლობა; მეტროს ვაგონების მოდერნიზაციის პროექტის გაგრძელება, რომლისთვისაც დაახლოებით, 12 მლნ ლარია გამოყოფილი; EBRD-ის დაფინანსებით, მუნიციპალიტეტი დამატებით, მეტროს 10 ახალ მატარებელს შეისყიდის; 12 მლნ ლარი თემქის ხევის, ვაკის პარკისა და გლდანის ტბის მიმდებარე ტერიტორიის პროექტირება-რეაბილიტაციისთვის გამოიყოფა.