მართალია, საკულტო ფილმის, Home Alone-ის მეორე ნაწილი 1992 წელს გამოვიდა, მაგრამ 27 წლის შემდეგაც ის ყველაზე ცნობილი საშობაო ფილმია, რომელსაც მსოფლიოს ყველა კუთხეში მილიონობით ადამიანი განსაკუთრებულად აქტიურად წლის მიწურულს უყურებს.

გამონაკლისი არც კანადაა, თუმცა წელს იქაური მაყურებელი ფილმს ერთი ახალი შესწორებით იხილავს: სატელევიზიო კომპანია CBC-მ Home Alone 2-დან დონალდ ტრამპის სცენა ამოჭრა.

ვისაც აშშ-ს ამჟამინდელი პრეზიდენტი ფილმიდან არ გახსოვთ, შეგახსენებთ, რომ ის ერთ-ერთ სცენაში რამდენიმე წამით ჩნდება, როცა სასტუმროში დაკარგული მთავარი გმირი, კევინ მაკკალისტერი მიმართულების გაგნებაში დახმარებას სთხოვს.

როგორც კომპანია CBC-ის წარმომადგენელი აცხადებს, ფილმში შესწორებები 2014 წელს შეიტანეს და ამ ვერსიით კინოსურათი პირველად 2016 წელს აჩვენეს ტელევიზიით, სანამ ტრამპი გახდებოდა აშშ-ს პრეზიდენტი, მეორედ კი წელს. თანაც კონკრეტულად ტრამპის სცენა არ ამოუჭრიათ, ჯამში სულ 8 წუთით შეამცირეს ფილმის ქრონომეტრაჟი და მათ შორის მოხვდა ეს ეპიზოდიც.

ამ ფაქტს, რა თქმა უნდა, გამოეხმაურა თავად დონალდ ტრამპი და ეს მოვლენა კანადის პრემიერ მინისტრს, ჯასტინ ტრუდოს დაუკავშირა:

"როგორც ჩანს, ჯასტინ ტ.-ს დიდად არ მოსწონს, რომ ნატოსთვისა და საერთაშორისო ვაჭრობისთვის დროულად ვახდევინებ ფულს", — წერს აშშ-ს პრეზიდენტი ტვიტერის პირად ანგარიშზე.

რამდენიმე დღით ადრე, სანამ ტრამპს ფილმიდან ამოჭრიდნენ, განაცხადა, რომ ამაყი იყო მასში მონაწილეობით:

"ყოველწლიურად, განსაკუთრებით კი საშობაო პერიოდში, მრავალი ადამიანი მეუბნება, რომ ამ ფილმში მიხილეს. უმეტესად კი პატარა ბავშვები აღნიშნავენ ამას."

ფილმიდან მისი სცენის ამოჭრის შემდეგ კი კიდევ ერთი ტვიტი გამოაქვეყნა:

"ეს ფილმი აღარასოდეს იქნება ისეთი, როგორიც იყო! (ვხუმრობ)"