სპორტის სამინისტრო კალათბურთის ფედერაციასთან ერთად შეთანხმდა, რომ 2021 წლის ევრობასკეტისთვის ახალი სპორტული არენის აშენებაზე უმჯობესია არსებული გადაკეთდეს. მათი თქმით, არსებული სპორტის სასახლის რეკონსტრუქციის ვარიანტი "ფაქტიურად ისევ ახალი სასახლის აშენების ტოლფასია".

"გვსურს დაგარწმუნოთ, რომ გადაკეთების შედეგად, ძირეულად იცვლება სპორტის სასახლის კონცეფცია. ძალზე სერიოზული სამუშაოებია ჩასატარებელი. FIBA-სთან რამდენიმე კვირის წინ გვქონდა მორიგი შეხვედრა, სადაც ზუსტად ეს პროექტი და ჩვენი მოსაზრებები კიდევ ერთხელ გავიარეთ, დაგვეთანხმნენ ამ საერთო ხედვაში, გვირჩიეს რომ მთავარია, დაკმაყოფილებული იყოს FIBA-ს მოთხოვნები და საერთაშორისო სტანდარტები", — განაცხადა კალათბურთის ფედერაციის გენერალურმა მდივანმა გიორგი ქართველიშვილმა.

23 დეკემბერს კალათბურთის ფედერაციის პრეზიდენტმა პაატა გურასპაულმა განაცხადა, რომ 2021 წლის ევრობასკეტისთვის ახალი სპორტის სასახლე აღარ აშენდება.

საქართველომ 2021 წლის ევრობასკეტის ჯგუფური ეტაპის მასპინძლობის უფლება 15 ივლისს, მიუნხენში გამართულ კალათბურთის საერთაშორისო ფედერაციის ევროპის კომიტეტის ასამბლეაზე მიიღო. ეს იმას ნიშნავს, რომ საქართველოს საკალათბურთო ნაკრები ავტომატურად მოიპოვებს ევროპის ჩემპიონატზე ასპარეზობის უფლებას, რომელიც ეროვნული ნაკრებისთვის მეხუთე ევრობასკეტი იქნება.

იმ შემთხვევაში, თუ საქართველო ვერ შეძლებს ფიბას სტანდარტების დარბაზის მომზადებას, მასპინძლობა შესაძლოა ავსტრიას გადაეცეს