ბოლო წლებში საქართველოში ფიტნეს დარბაზების რაოდენობა მნიშვნელოვნად გაიზარდა, შესაბამისად, ჯანსაღი ცხოვრების წესის მიმდევრების რაოდენობაც იზრდება. თავდაუზოგავად ვარჯიში ბევრისთვის ჰობიც კი გახდა. სასურველი ფორმები მხოლოდ ვარჯიშით არ მიიღწევა, საჭიროა ბევრი პატარა და მნიშვნელოვანი დეტალის გათვალისწინება, რომელიც დაგეხმარებათ მიზნის უფრო სწრაფად და მარტივად მიღწევაში. წარმოგიდგენთ რამდენიმე მათგანს და დამერწმუნეთ, თუ მათ გაითვალისწინებთ, სასურველ შედეგს უფრო მარტივად მიაღწევთ.

1. დალიეთ დიდი რაოდენობით წყალი და მწვანე ჩაი

წყალი და მწვანე ჩაი წმენდს თქვენს ორგანიზმს ტოქსინებისგან. მავნე ნივთიერებებიდან ზოგიერთი ენერგიის მიღებაში გიშლით ხელს, ამიტომ თქვენი მეტაბოლიზმი ნელდება და წონაში დაკლების შესაძლებლობაც მცირდება. შესაბამისად, მათი გამოდევნით თქვენს სხეულსაც დაეხმარებით.

2. ძილი, ძილი და მეტი ძილი

ალბათ, ახალი ამბავი არაა, რომ ჯანსაღი ცხოვრება საკმარისი ძილის გარეშე წარმოუდგენელია. მიუხედავად ამისა, ბევრი ადამიანი ძილის მნიშვნელობას ჯერაც ვერ აფასებს. ღამის განმავლობაში სულ ცოტა 7 საათი უნდა გეძინოთ. კვლევები აჩვენებს, რომ შუა ხნის ასაკში სწორედ ძილის ნაკლებობა უწყობს ხელს ჭარბი წონის მატებას.

ასევე გაითვალისწინეთ ისიც, რომ ძილის ნაკლებობა არა მხოლოდ მადას აძლიერებს, არამედ ზრდის იმ საათების რაოდენობასაც, როდესაც ფხიზლად ხართ და გშიათ. შედეგად ვიღებთ უკონტროლო კვებას, რომელიც იწვევს ცხიმის დაგროვებას ორგანიზმში.

გარდა ამისა, საკმარისი რაოდენობის ძილი ხელს უწყობს ორგანიზმში ცხიმოვანი ქსოვილის შლას.

3. ივარჯიშეთ ფიტნეს ინსტრუქტორთან ერთად

დამწყებისთვის საკმაოდ რთულია საჭირო ვარჯიშების შერჩევა და მათი სწორად შესრულება, ამიტომ პირადი ინსტრუქტორის აყვანა დროსა და ენერგიას დაგაზოგინებთ. მწვრთნელმა უკეთესად იცის, რომელი ვარჯიშები გჭირდებათ და როგორ შეიძლება თქვენი დროის ეფექტურად გადანაწილება.

გასათვალისწინებელია ისიც, რომ შედეგს სწორი კვების რაციონის გარეშე ვერ მიაღწევთ, გამოცდილი ფიტნეს ინსტრუქტორი ამაშიც დაგეხმარებათ და შესაფერის დიეტას შეგირჩევთ.

4. დაგეგმეთ და გაამზადეთ საკვები დაძინებამდე

სწორი კვება მოითხოვს რეჟიმს და დღის განმავლობაში ხშირ კვებას. ყოველი ჭამის წინ მენიუს გათვლა რთულია და დროც ბევრი მიაქვს. თუ ყოველ საღამოს გაამზადებთ შემდეგი დღის საჭმელს, ბევრად გაგიადვილდებათ კვების რეჟიმის დაცვა. ამისთვის კონტეინერები დაგჭირდებათ, რომელსაც თან ატარებთ.

5. მოერიდეთ წახემსებას

ნივთიერებათა ცვლის დარეგულირებისთვის აუცილებელია კვების რეჟიმის დაცვა. თუ გვსურს, რომ ცხიმის წვა მოწესრიგებულად ხდებოდეს მთელ ორგანიზმში, მაშინ უნდა მოვერიდოთ საკვების გაუთვალისწინებელ მიღებას (ჭამის შუალედებში წახემსებას). წახემსება შეიძლება იშვიათ შემთხვევებში, ისიც დოზირებულად, მაქსიმუმ 150-200 კალორიის ოდენობით.

6. არ გააცდინოთ ვარჯიშები

ინტენსიური ვარჯიში თქვენი მთავარი იარაღი იქნება ცხიმოვან მასასთან ბრძოლაში. მხოლოდ ვარჯიშით არის შესაძლებელი, რომ უშუალოდ ცხიმის ხარჯზე დაიკლოთ წონა და მას კუნთები თან არ მიაყოლოთ. ეცადეთ, ვარჯიშისას ორგანიზმი არ გამოიფიტოს, კუნთების ტონუსში ყოფნა ენერგიის მატებაშიც დაგეხმარებათ.

7. მოთმინება და თავის არდაზოგვა

შედეგის მიღებას დრო სჭირდება. მოთმინებით უნდა შეიარაღდეთ და ნელ-ნელა დაიკლოთ წონა. ნებისყოფისა და მოთმინების დახმარებით ცხოვრების უკეთესობისკენ შეცვლის უამრავი მაგალითი არსებობს, ამიტომ ნებისმიერ თქვენგანს შეუძლია სასურველი შედეგის მიღწევა. მთავარია საკუთარ თავზე მუშაობა დღესვე დაიწყოთ და მომდევნო „ორშაბათისთვის“ არ გადადოთ.