ჭყონდიდის ახალმა მიტროპოლიტმა მეუფე გრიგოლ კაციამ თქვა, რომ ეგონა უკვე შეიწყალეს ე.წ. ციანიდის საქმეზე მსჯავრდებული დეკანოზი, გიორგი მამალაძე. ამის შესახებ მან დღეს, 22 დეკემბერს ტელეკომპანია რუსთავი 2-ის ჟურნალისტს უთხრა.

"მეგონა უკვე შეიწყალეს, არა? სინოდმა მიიღო გადაწვეტილება შეწყალებაზე... მე მგონია უნდა შეიწყალოს [პრეზიდენტმა] და ახალ წელს სახლში უნდა შეხვდეს", — თქვა გრიგოლ კაციამ.

სინოდმა თითქმის ორწლიანი პატიმბრობის შემდეგ ოქტომბერში გიორგი მამალაძის შეწყალებაზე შუამდგომლობის გადაწყვეტილება მიიღო, თუმცა 23 ნოემბერს, გიორგობის დღესასწაულთან დაკავშირებით, გიორგი მამალაძე პრეზიდენტმა არ შეიწყალა. თუმცა, რამდენი თვით ადრე პრეზიდენტის მიერ შეყწალებულთა სიაში მოხდვდნენ მძიმე დანაშაულისათვის მსჯავრდებულები. ხმაურიანი შეწყალებების შემდეგ კი პრეზიდენტმა შეწყალების დახვეწის ინიაციატივა გამოთქვა და 18 სექტემბერს შეწყალებაზე მორატორიუმი გამოაცხადა.

გიორგი მამალაძე 2017 წლის 10 თებერვალს თბილისის საერთაშორისო აეროპორტში დააკავეს. დეკანოზის დაკავების შესახებ ინფორმაცია პროკურატურამ 13 თებერვალს გაავრცელა. მას პატრიარქის მდივან-რეფერენტის, შორენა თეთრუაშვილის მკვლელობის მომზადება ედება ბრალად. შორენა თეთრუაშვილი, ილია მეორესთან ერთად, აღნიშნულ პერიოდში ბერლინში იყო, სადაც პატრიარქი მკურნალობდა.

დეკანოზი გიორგი მამალაძე სასამართლომ დამნაშავედ სცნო და მას შორენა თეთრუაშვილის განზრახ მკვლელობის მომზადებისა და იარაღის უკანონო შენახვა-ტარებისთვის ცხრაწლიანი პატიმრობა მიუსაჯა.

13 თებერვალს თბილისის სააპელაციო სასამართლომ დეკანოზ გიორგი მამალაძის მიმართ გამოტანილი განაჩენი ძალაში დატოვა, უზენაესმა სასამართლომ კი დაუშვებლად სცნო.