გაფრთხილება: სტატია შეიცავს სპოილერებს სერიალის პირველი სეზონიდან.

ფსიქოლოგიური თრილერების მოყვარულები ჯობს კარგად მოემზადოთ, რადგან 10 დღეში Netflix-ზე ამერიკული სერიალი You მეორე სეზონით ბრუნდება. 26 დეკემბერს მაყურებელი გაიგებს, როგორ აგრძელებს საზარელი მკვლელობების შემდეგ ცხოვრებას მთავარი გმირი, ჯო გოლდბერგი, რომლის როლსაც პენ ბეჯლი ასრულებს.

ახალი სეზონის პირველი ტრეილერი ნეტფლიქსმა დღეს გამოაქვეყნა. მისი მიხედვით, ლოს-ანჯელესში საცხოვრებლად გადასული ჯო ცდილობს ცხოვრება თავიდან დაიწყოს, თუმცა როგორ უნდა შეძლოს ეს, თუ მის გონებაში მხოლოდ წარსული ტრიალებს?

თუ ამ აბზაცს უკვე კითხულობ და პირველი სეზონი ჯერ ნანახი არ გაქვს, სპოილერებზე პასუხისმგებლობა შენ გეკისრება. პირველ სეზონში უკვე ვიხილეთ ჯოს მრავალი მსხვერპლი, მათ შორის ბეკი, რომელმაც ფსიქოპათთან ურთიერთობას თავი ცოცხალმა ვერ დააღწია. თუმცა რაც შეეხება ჯოს ყოფილ შეყვარებულს, კენდისს, ყველასგან მოულოდნელად ის ნამდვილად გადაურჩა საშინელ წარსულს და ახლა საკითხავი ისაა, მისცემს თუ არა მოძალადე ექსს მშვიდად ცხოვრების უფლებას, რაც ჯოს გაგებით ადამიანების თვალთვალსა და მათი ცხოვრების კონტროლს გულისხმობს?

შეიძლება ვიფიქროთ, რომ ლოს-ანჯელესში გოლდბერგი მხოლოდ წარსულს კი არა, კენდისსაც გაექცა. ის ახალ მსხვერპლს — ლავს ხვდება, რომლის როლსაც Haunting of Hill House-ის მსახიობი ვიქტორია პედრეტი ასრულებს.

სანამ თავს ოპტიმიზმის უფლებას მისცემთ, გაგახსენებთ შოუს შემქმნელი სარა გეიმბლის სიტყვებს, რომელმაც ჯერ კიდევ აგვისტოში თქვა, რომ ახალი სერიები წინაზე უფრო საშიში და ავისმომასწავებელი იქნება. ხოლო ახალ სეზონში მთავარ პერსონაჟს ბევრი ისეთი გადაწყვეტილების მიღება უწევს, რაც თავადაც არ მოსწონს.

ნიუ-იორკში გადაღებული პირველი სეზონი 2018 წლის სექტემბერში გამოვიდა და ის ქეროლაინ კეპნესის იმავე სახელწოდების წიგნზეა დაფუძნებული. მეორე სეზონი იგივე ავტორის 2016 წლის სიქველზე, Hidden Bodies არის აგებული, თუმცა ის, ვისაც წიგნი წაკითხული აქვს, სერიალში ცვლილებებს უნდა ელოდოს.