21 ოტომბერს, ბოდბესთან სამხედრო ავტომობილის ავარიის შედეგად დაშავებული სამხედროები ამ დრომდე საავადმყოფოში რჩებიან. მათგან ერთის მდგომარეობა განსაკუთრებით მძიმეა.

დაშავებულები გვიან ღამით მოინახულეს ჯანდაცვისა და თავდაცვის მინისტრებმა, ასევე, უშიშროების საბჭოს წარმომადგენლებმა. თავდაცვის მინისტრმა ჟურნალისტებს განუცხადა, რომ ავტოავარია სრულად იქნება გამოძიებული.

სამხედრო ავტომობილი, რომელშიც 36 სამხედრო მოსამსახურე და ერთი სამოქალაქო პირი იმყოფებოდა, ავარიაში ბოდბესთან ახლოს მოყვა. ჯარების ლოგისტიკური უზრუნველყოფის სარდლობის საბრძოლო მასალებისა და სამხედრო - ტექნიკური ქონების შენახვის ბაზის სამხედრო მოსამსახურეები დედოფლისწყაროდან ოსიაურისკენ გადაადგილდებოდნენ. ავტოსაგზაო შემთხვევის შედეგად გარდაიცვალა ერთი სამხედრო მოსამსახურე. 27 დაშავებული სამხედრო მოსამსახურე ჯერ დედოფლისწყაროს საავადმყოფოში გადაიყვანეს, მოგვიანებით სამხედროების ნაწილი გორის ჰოსპიტალში, ნაწილი კი თბილისის კლინიკებში განათავსეს. დაშავებულთა სიცოცხლეს საფრთხე არ ემუქრება.