ინფრასტრუქტურის მინისტრი მაია ცქიტიშვილი აცხადებს, რომ საერთაშორისო გამჭვირვალობა — საქართველოს (TI) კვლევა ჯერ არ უნახავს, თუმცა გამორიცხავს, რომ მის ქონებრივ დეკლარაციაში ინფორმაცია არასრულად იყოს შევსებული. მინისტრის თქმით, მას და მის ქმარს არ აქვთ არავითარი საქმიანობა, რომელიც ოფიციალურად არ მიუთითებია.

"არც ჩემი და არც ოჯახის წევრების საქმიანობა არ არის დაკავშირებული სამეწარმეო საქმიანობასთან", — განაცხადა მან ჟურნალისტებთან.

TI-ს კვლევის მიხედვით, თანამდებობის პირებს არასრულად აქვთ გასაჯაროებული საკუთარი ან ოჯახის წევრის სამეწარმეო საქმიანობა. მათ შორის 3 მინისტრს: მაია ცქიტიშვილს, ეკატერინე ტიკარაძესა და ლევან დავითაშვილს.

ორგანიზაციის განცხადებით, დეკლარაციაში მაია ცქიტიშვილს არ აქვს ნახსენები, რომ მისი ქმარი შპს მიკროკლიმატის დირექტორიცაა, და რომ 2018 წლის აგვისტოს შემდეგ იგი ამ კომპანიის 100%-ს ფლობს. მათი თქმით, ცქიტიშვილს, არ უხსენებია ისიც, რომ 2018 წლის მარტამდე შპს თბილისის კომერციული ქონების 75%-ს თავად ფლობდა, რომელიც ქმარს აჩუქა, თუმცა დეკლარირების ვალდებულება მაინც არსებობდა.

ფოტო: TI