ლეიბორისტული პარტიის წევრმა, ლაშა ჩხარტიშვილმა საპატიმრო დაწესებულება დატოვა. ეროვნულ ბიბლიოთეკასთან აქციაზე დაკავების შემდეგ მას რვადღიანი ადმინისტრაციული პატიმრობა შეეფარდა.

საპატიმრო დაწესებულებიდან გამოსვლის შემდეგ ჩხარტიშვილმა კამერების წინ ორუელის 1984 აჩვენა და განაცხადა, რომ ბიძინა ივანიშვილის "ოცნება ერთპიროვნული დიქტატურაა". გარდა ამისა, მან ჰაერში ლობიოს მარცვლები აყარა.

"ასეთი ოცნება ჰქონდათ სხვებსაც. მაგრამ ის, რაც ჩაიდინა ივანიშვილმა პოლიტიკურ დაკავებებთან დაკავშირებით, არ გაუკეთებიათ არც შევარდნაძეს და არც სააკაშვილს. მან ადვოკატისა და გასაჩივრების უფლების გარეშე დაიწყო დაკავებები. მინდა ვუთხრა ლობიოს დიქტატორს, მას ეკუთვნის უმი ლობიო, როგორს მონების სალაფავი და ეს აუცილებლად ექნება პასუხისგებაში მიცემის წინ თავის მონებთან ერთად", — განაცხადა ჩხარტიშვილმა.

ლაშა ჩხარტიშვილი ხუთ პირთან ერთად 29 ნოემბერს დააკავეს. როგორც მისი პარტიის წევრები და მხარდამჭერები აცხადებდნენ, ჩხარტიშვილი დააკავეს, რადგან მან ჰაერში რამდენიმე მარცვალი ლობიო აყარა.

ამის შემდეგ მოძრაობა #გაბედეს წევრებმა ახალი კამპანია "შეაყარე ოცნებას ლობიო" წამოიწყეს.

ბოლო დღეების მოვლენები

მას შემდეგ, რაც ქართული ოცნების დეპუტატებმა პროპორციული საარჩევნო სისტემის კანონპროექტი ჩააგდეს, საქართველოს მასშტაბით სხვადასხვა ქალაქებში საპროტესტო აქციები იმართება. ოპოზიციური პარტიები გაერთიანდნენ და შექმნეს ახალი პლატფორმა "ერთად ერთის წინაამდმდეგ", რომლის მიზანიც გერმანული საარჩევნო მოდელის მოთხოვნაა.

აქტივისტებისა და პარტიის მხარდამჭერების საერთო პროტესტის ფარგლებში პიკეტირებული იყო მთავარი საკანონმდებლო ორგანო, რომლის შესასვლელებიც ხელისუფლებამ ორჯერ სპეცრაზმისა და წყლის ჭავლის გამოყენებით გახსნა.

აქციის დაშლის შემდეგ სრულად ოპოზიციურმა სპექტრმა და სამოქალაქო აქტივისტებმა პროტესტი ახალი ფორმა "მაინც დაგაბოქლომებთ" დაიწყეს. ისინი სხვადასხვა ადმინისტრაციულ შენობებსა და ქართული ოცნების დეპუტატების ოფისებს ბოქლომებს ადებენ.

მას შემდეგ, რაც პარლამენტის პიკეტი მესამედ დაანონსდა, ხელისუფლებამ პარლამენტის მიმდებარე ქუჩები რკინის კონსტრუქციებით ჩაკეტა. კონსტრუქციები ხელს უშლიდა მოქალაქეებს გადაადგილებაში. პოლიციამ გზები აქციის დაშლის შედეგ გაათავისუფლა.

აქციებმა მაჟორიტარი დეპუტატებისა და ოცნების ოფისთან გადაინაცვლა, სადაც აქტივისტებს მმართველი გუნდის მხარდამჭერები ხვდებოდნენ და ფიზიკურად უსწორდებოდნენ. გარდა ამისა, განახლდა საპროტესტო მოძრაობა "არა ნაცებს" და გაიმართა აქციები სახელად "დემიშიზაცია", რომელთა წევრები ნაციონალური მოძრაობის ოფისებს კვერცხებს და ცოცხებს ესროდნენ, მხარდამჭერებსა და აქტივისტებს კი ფიზიკურად უსწორდებოდნენ.