პაკისტანელმა აქტივისტმა მალალა იუსუფზაიმ, რომელიც "ინვესტიცია მომავლისთვის" მხარდაჭერით გამართულ კონფერენციაში მიიღო მონაწილეობა საჯაროდ გამოთქვა სურვილი, რომ მას სურს გახდეს პაკისტანის პრემიერმინისტრი და იზრუნოს მშვიდობისთვის, საყოველთაო განათლების უფლებისა და ქალთა უფლებებისთვის.

"ვერ წარმომიდგენია ჩემი თავი განათლების გარეშე. განათლება სჭირდება ყველა გოგოს და ქალს, ჩვენ გვჭირდება ქალები, რომლებიც შთაგონების წყარო და მისაბაძი მაგალითები გახდებიან არა მხოლოდ ქალების, არამედ მამაკაცებისთვისაც, დღევანდელი ღონისძიება გვიჩვენებს, რომ არაბული სამყარო პოზიტიურობისკენ უნდა შევცვალოთ, ეს არის გზა რომელიც ახლო აღმოსავლეთში ქალებმა უნდა გაიარონ, მუსლიმმა ქალებმა. ჩვენ უნდა გავაცნობიეროთ რომ ჩვენი ჩართულობა ყველაზე მნიშვნელოვანი და საჭიროა ჩვენი უფლებებისა და პოზიტიური ცვლილებებისთვის. მათ ვინც, პატრიარქატულ სამყაროში მაიძულებდნენ ჩემი პოტენციალი ჩამეკლა, რადგან მუდმივად მიმეორებდნენ, თითქოს მე, როგორც ქალს, არაფერი გამომივიდოდა ჩემს ცხოვრებაში, მინდა ვუთხრა და დავუმტკიცო რომ ცდებიან. დიახ, ჩემი მთავარი ოცნება, გავმხდარიყავი ექიმი შეიცვალა, დღეს ჩემი ოცნებაა გავხდე პაკისტანის პრემიერმინისტრი", ამბობს მალალა.

მალალა საქვეყნოდ ცნობილი მას შემდეგ გახდა, რაც 2009 წელს, 11 წლის ასაკში "ბიბისის" ბლოგერი გახდა, სადაც "თალიბანის" რეჟიმის პარალელურად საკუთარ ცხოვრებაზე და გოგონების განათლების უფლებებისთვის წერდა. 2009 წელს პაკისტანში თალიბებმა თავიანთ კონტროლირებად ტერიტორიაზე გოგოებს სკოლაში სიარული აუკრძალეს. 11 წლის მალალამ გადაწყვიტა, დაეცვა თავისი განათლების უფლება, თუმცა მის პროტესტს მძაფრი რეაქცია მოჰყვა.

2012 წელს "თალიბებმა" მისი მოკვლა სცადეს და გოგონა მძიმედ დაჭრეს.

მალალა ახლა დიდ ბრიტანეთში, მშობლებთან ერთად ცხოვრობს. იქიდანვე აგრძელებს თავის საქმიანობას და ამ სიმამაცისა და შემართებისთვის მიღებული აქვს ნობელის პრემია მშვიდობის დარგში, ანდრეი სახაროვისა და ანა პოლიტკოვსკაიას სახელობის პრემიები.

2015 წელს დიდ ეკრანებზე იუსუფზაის ისტორიაზე გადაღებული დოკუმენტური ფილმი გამოვიდა - მან მე მალალა დამარქვა. ფილმში ის თავდასხმამდე და თავდასხმის შემდეგ პერიოდს იხსენებს. ფილმის რეჟისორს სურს, რომ 18 წლის პაკისტანელი გოგოს ოცნებები გაამხილოს, მალალა კი მხოლოდ ერთი ოცნება აქვს - „მინდა მსოფლიოს ყველა გოგო და ბიჭი სწავლობდეს; სკოლაში თანაკლასელების გვერდით, ჩემს მაგიდასთან ჯდომა და კითხვა ჩემი უფლებაა. ყოველი ადამიანის სახეზე ბედნიერი ღიმილის ხილვაა ჩემი ოცნება”, ამბობს მალალა.

„ავიღოთ ჩვენი წიგნები და კალმები, ისინი ჩვენი ყველაზე ძლიერი იარაღებია. ექსტრემისტებს მუდამ ეშინოდათ და ეშინიათ წიგნების და კალმების. მათ ქალებისაც ეშინიათ.

მე მინდა, რომ განათლება თალიბების, ტერორისტებისა და ექსტრემისტების შვილებმა მიიღონ. ერთ ბავშვს, ერთ მასწავლებელს, ერთ წიგნს და ერთ კალამს შეუძლია შეცვალოს მსოფლიო. განათლება ერთადერთი გამოსავალია. განათლება უპირველესია", - ეს სიტყვები მალალა იუსუფზაის ეკუთვნის პაკისტანელ აქტივისტსა და ნობელის პრემიის ყველაზე ახალგაზრდა მფლობელს.