კონგოელმა ქალებმა, რომლებიც ომის დროს სექსუალური ძალადობის მსხვერპლები გახდნენ, მოდის ჩვენებაზე პოდიუმზე სიამაყით გაიარეს, რათა გადატანილი ტრავმის მიუხედავად თავიანთი სიძლიერე ეჩვენებინათ და სხვა მსხვერპლი ქალებისთვის სოლიდარობა გამოეხატათ.

ყოველ 25 ნოემბერს ქალთა მიმართ ძალადობის აღმოფხვრის საერთაშორისო დღე აღინიშნება, წელს კი სწორედ ამ დღესთან დაკავშირებით კონგოში ხუთმა ადგილობრივმა დიზაინერმა ჰოლანდიურ ქსოვილების ფირმა Vlisco-სთან თანამშრომლობით სპეციალური ჩვენება გამართა, რომელიც მსხვერპლი ქალების გაძლიერებას ისახავდა მიზნად. ჩვენებაში სულ თხუთმეტმა კონგოელმა ქალმა მიიღო მონაწილეობა.

"როცა მათთვის ვქმნიდი სამოსს, მე არ ვფიქრობდი, რომ ისინი მსხვერპლები იყვნენ, პირიქით — წარმოუდგენლად ძლიერ ქალებს ვხედავდი, რომლებმაც სიცოცხლე თავიდან დაიწყეს მას შემდეგ, რისი გადატანაც მოუწიათ. ამიტომაც ყოველ ქსოვილს მათ ტანზე სწორედ ეს ძალაუფლება უნდა გამოეხატა სრულყოფილად", — განაცხადა ბრიტანელ-ნიგერიელმა დიზაინერმა, თოლუ კოკარმა, რომლის სამოსსაც ხშირად იცვამს მომღერალი რიანა.

ფოტო: City of Joy

კონგოს რესპუბლიკის აღმოსავლეთ ნაწილში 1998-2003 წლებში მიმდინარე ომში გაუპატიურება შეიარაღებული ძალების ერთ-ერთ ძალადობრივ იარაღს წარმოადგენდა, რომლითაც თავიანთი სამხედრო თუ პოლიტიკური კონტროლის დამყარება სურდათ.

"იმის მიუხედავად, რომ კონგოში მომხდარი ომის შესახებ ვიცით, არ მგონია ბევრ ჩვენგანს სათანადოდ ესმოდეს, თუ რა კვალი დატოვა ამან ქალებზე", - დაამატა დიზაინერმა თოლუ კოკარმა.