გირჩის მიერ დაფუძნებული რელიგიური ორგანიზაცია ბიბლიური თავისუფლება საკუთარ მღვდელმსახურებს მონანიებისა და ეკლესიის მსახურებიდან გასვლის შესაძლებლობას სთავაზობს. მათი თქმით, აღნიშნული მომსახურება 50 ლარი ღირს.

მღვდელმსახურის სტატუსის გასაუქმებლად, ბიბლიური თავისუფლების წევრები გირჩის ოფისში, ბესიკის 4-ში, ორშაბათიდან პარასკევის ჩათვლით, 14:00-დან 17:00 საათამდე უნდა მოვიდნენ. მსურველებმა პირადობის მოწმობა, გაცემული მოწმობა, მისი ასლი ან კურთხევის საფასური უნდა წარადგინონ.

გირჩმა ბიბლიური თავისუფლება ორი წლის წინ, ახალგაზრდების სავალდებულო სამხედრო სამსახურიდან გასათავისუფლებლად დააფუძნა. ამ დროისთვის რელიგიურ ორგანიზაციას 30 ათასამდე მღვდელმსახური ჰყავს.

რამდენიმე კვირის წინ სამტრედიაში გარდაცვლილი 24 წლის შაკო ბარამიძე, რომელსაც გირჩის ეკლესიის მღვდელმსახურის მოწმობა ჰქონდა, წესის აგების გარეშე დაკრძალეს.

ავტოავარიაში დაღუპულ 24 წლის ბიჭს სამხედრო სამსახურისთვის თავის ასარიდებლად ბიბლიური თავისუფლების მღვდელმსახურის მოწმობა ჰქონდა. მართლმადიდებელმა მღვდლებმა მას წესის აგებაზე უარი უთხრეს. გირჩში ამბობენ, რომ ბიჭის ოჯახს მისი მართლმადიდებლური წესით დაკრძალვა სურდათ. საპატრიარქოს პრესცენტრის ხელმძღვანელი, ანდრია ჯაღმაიძემ კი On.ge-სთან განაცხადა, რომ ეკლესია ვერ აუგებს წესს და ვერც რაიმე სხვა მსახურებას აღასრულებს ადამიანისათვის, რომელიც მისი წევრი აღარ არის.

გირჩში აღნიშნეს რომ ბიბლიურმა თავისუფლებამ გასცა ცნობა, რომელშიც აღნიშნული იყო, რომ შაკო ბარამიძის სახელზე გაცემული მღვდელმსახურის მოწმობა გაუქმებულია და გარდაცვლილი პიროვნება აღარ ირიცხებოდა მათი ეკლესიის მღვდელმსახურად:

"აღნიშნული ცნობის შესახებ, ოჯახმა შეატყობინა, როგორც სასულიერო პირებს, ასევე საპატრიარქოს და კიდევ ერთხელ ითხოვა წესის აგება, თუმცა კვლავ უარი მიიღო მათგან. გარდაცვლილი ოჯახს შაბათს უნდა დაეკრძალა, თუმცა დღემდე დაუკრძალავი რჩება და ოჯახი კვლავ ეძებს მართლმადიდებელ სასულიერო პირს, რომელიც წესს აუგებს გარდაცვლილს".