ავსტრალიაში ბოლო რამდენიმე დღეა მასშტაბურ ხანძარს ებრძვიან, რომელმაც მილიონ ჰექტარზე მეტი მოცულობის ტყე გაანადგურა. ამ კატასტროფამ დიდი ზიანი მიაყენა ცხოველების ენდემურ სახეობებს, მათ შორის განსაკუთრებულად კი კოალებს — ხანძარი სწორედ მათ საცხოვრებელ არეალში გავრცელდა.

ბოლო ინფორმაციით, უკვე 350-ზე მეტი კოალა დაიღუპა ხანძრის გამო და მათი საცხოვრებელი გარემოს 75% განადგურდა. ამ მონაცემების გათვალისწინებით შიშობენ, რომ ავსტრალიის ეროვნული სიმბოლო გადაშენების ზღვარს უახლოვდება.

ავსტრალიის ეროვნული ზოოპარკის ცნობით ამჟამად მხოლოდ 40,000-დან 100,000-მდე კოალაა დარჩენილი ველურ ბუნებაში: ხანძრების, საცხოვრებელი არეალის გაქრობის, ძაღლების თავდასხმების, საგზაო შემთხვევებისა და მათ ბეწვზე ნადირობის გამო ბოლო წლებში 2,5 მილიონზე მეტი კოალა მოკვდა.

"ველურ ბუნებაში კოალების სახეობის არსებობას დიდი საფრთხე ემუქრება და ჩვენ მაქსიმალურად უნდა დავიცვათ ისინი", — აცხადებენ ავსტრალიის ეროვნულ ზოოპარკში.

გასულ სეზონთან შედარებით წლევანდელი ხანძარი ავსტრალიაში სამჯერ უფრო ძლიერია, რამაც მრავალი საცხოვრებელი ადგილი გაანადგურა და ოთხი ადამიანის სიცოცხლე იმსხვერპლა. ეს კი იმის გათვალისწინებით, რომ ავსტრალიაში ზაფხული ჯერ კიდევ არ დაწყებულა — პირველი დეკემბრიდან ტემპერატურის კიდევ უფრო მატებას ელოდებიან.