"დღეს კიდევ ერთხელ ებრძვიან ეკლესიას, რომლის ირგვლივაც ქართველები ყოველთვის იკრიბებოდნენ და იკვრებოდნენ განსაცდელის დასაძლევად, ებრძვიან ეკლესიას, რომელზეც იდგა და დგას საქართველოს დამოუკიდებლობა", — ამის შესახებ საქართველოს პრეზიდენტმა, სალომე ზურაბიშვილმა ომის ვეტერანების ოჯახებთან შეხვედრაზე განაცხადა.

მისი თქმით, დაპირისპირების დრო არ არის, მით უმეტეს მაშინ, როცა ქვეყანა ოკუპირებული ტერიტორიებიდან ყოველდღიური გამოწვევების წინაშეა.

"როდესაც ვხედავთ, თუ როგორ იყენებს ზოგი ჩვენს დღევანდელ დასუსტებას. დაპირისპირების დრო არ არის მაშინ, როდესაც ცხინვალში ჩვენი ღირსეული ექიმის გათავისუფლებისთვის უნდა იყოს მიმართული ჩვენი საყოველთაო ძალისხმევა და ეს ამოცანა უნდა გვაერთიანებდეს", — თქვა მან.

ის მოუწოდებს პარლამენტს, მოინახოს გამოსავალი, რომელიც ყველას ვერ დააკმაყოფილებს, მაგრამ დაძაბულობას განმუხტავს.

"და, რაც მთავარია, მოვუწოდებ ყველას, გაგრძელდეს მუშაობა საარჩევნო კოდექსზე, რათა ჩვენს მოქალაქეებს მიეცეთ საშუალება, სამართლიანი არჩევნების გზით, თავისუფლად გამოხატონ საკუთარი ნება. ეს იქნება გამარჯვება, ეს იქნება გიორგობის გამარჯვება", — თქვა პრეზიდენტმა.