"პრეზიდენტი გმობს რამდენიმე დღის წინ მომხდარ შემზარავ ფაქტს, ძალადობას ტრანსგენდერ მოქალაქეზე. პრეზიდენტი მიესალმება, რომ ამ თემაზე მიმდინარეობს გამოძიება და მიიჩნევს, რომ უმნიშვნელოვანესია დადგინდეს თავდასხმის რეალური მიზეზი", - ამის შესახებ განცხადება პრეზიდენტის პრესსპიკერმა, ეკა მიშველაძემ, დღეს გამართულ ტრადიციულ ბრიფინგზე გააკეთა.

მიშველაძემ ისაუბრა არჩევნებთან დაკავშირებითაც. მისი თქმით, პრეზიდენტი ამომრჩეველს მეორე ტურში აქტიურობისკენ მოუწოდებს. პრეზიდენტის პრესსპიკერის ცნობით, პრეზიდენტი იმედს გამოთქვამს, რომ არჩევნების მეორე ტური ჩატარდება გამჭვირვალედ, მშვიდობიანად და სამართლიანად, ყველა იმ ხარვეზის გარეშე, რომელსაც ადგილი ჰქონდა პირველი ტურის დროს რამდენიმე ოლქში:

"საარჩევნო საკითხების სრულ სიცხადეზე პასუხისმგებელი, პირველ რიგში, ცენტრალური საარჩევნო კომისიაა. შესაბამისად, ძალიან მნიშვნელოვანია, დროულად გამოქვეყნდეს ყველა ოფიციალური მონაცემი, მათ შორის ბათილი ბიულეტენების რაოდენობასთან დაკავშირებით, იმისთვის, რომ დაინტერსებულ საზოგადოებას ჰქონდეს სრული ინფორმაცია არჩევნების პროცესის ანალიზისთვის და არ მიადგეს ჩრდილი ამ მნიშვნელოვანი არჩევნების სამართლიანობასა და ობიექტურობას. მით უმეტეს მაშინ, როდესაც ბოლო ორი არჩევნების განმავლობაში, ბათილი ბიულეტენების თემა, საზოგადოებისა და პოლიტიკური პარტიების სერიოზულ შეშფოთებას იწვევს."

მიშველაძის თქმით, რუსეთის სახელმწიფო დუმის თავდაცვის კომიტეტის მიერ, ოკუპირებულ აფხაზეთთან ე.წ. ჯარების გაერთიანებული დაჯგუფების შექმნის შეთანხმების რატიფიცირების მხარდაჭერა რეალურად არის ქმედება, რომელიც მიზნად ისახავს, რუსეთის საოკუპაციო ჯარების აფრხაზეთში ლეგალიზებას:

"პრეზიდენტი გმობს ამ ფაქტს და მას საქართველოს ტერიტორიის ანექსიისკენ გადადგმულ კიდევ ერთ ნაბიჯად აფასებს, რაც პრეზიდენტის აზრით, საფრთხეს უქმნის არა მარტო საქართველოს სუვერენიტეტს, არამედ რეგიონში მშვიდობისა და სტაბილურობის შენარჩუნებას. პრეზიდენტი საერთაშორისო თანამეგობრობას რეაგირებისკენ მოუწოდებს."