იტალიის ჩრდილო-აღმოსავლეთ რეგიონის, ვენეტოს საბჭოს შენობა ისტორიაში პირველად დაიტბორა წყლით. ეს კი თითქმის მაშინვე მოხდა, როცა კლიმატის ცვლილებასთან დაკავშირებული მნიშვნელოვანი ღონისძიებების გატარება რეგიონალურმა საბჭომ მიზანშეწოლილად არ მიიჩნია.

საბჭოს შენობა იტალიის ისტორიულ ქალაქ ვენეციაში მდებარეობს, რომელსაც რამდენიმე დღის წინ ბოლო ორმოცდაათი წლის განმავლობაში ყველაზე ძლიერი წყალდიდობა დაატყდა თავს.

სწორედ წყალდიდობის დროს, როცა საბჭოს წევრები 2020 წლის რეგიონალურ ბიუჯეტზე მსჯელობდნენ, ღამის 10 საათზე საბჭოს შენობა დაიტბორა. ამ ფაქტის ამსახველი ფოტომასალა საბჭოს ერთ-ერთმა წევრმა, ანდრეა ზანონიმ გაავრცელა:

"ირონიულია, რომ შენობა ზუსტად რამდენიმე წუთში დაიტბორა, როცა უმრავლესობამ კლიმატის ცვლილების წინააღმდეგ ჩვენ მიერ შეთავაზებული აუცილებლად გასატარებელი ღონისძიებების საჭიროება უარყო", - წერს თავის ფეისბუქგვერდზე ანდრეა ზანონი, რომელიც გარემოს დაცვის კომიტეტს ხელმძღვანელობს.

ვენეციის დატბორვას ქალაქის მერი, ლუიჯი ბრუნიაროც გამოეხმაურა და ამ მოვლენას "კლიმატის ცვლილების შედეგი" უწოდა.

ვენეციაში წყალდიდობის შედეგად წყლის დონემ ბოლო ორმოცდაათი წლის განმავლობაში რეკორდულ მაჩვენებელს — 187 სანტიმეტრს მიაღწია.

ფოტო: Luca Bruno