საქართველოს პრეზიდენტის სალომე ზურაბიშვილის მსგავსად კონსტიტუციური ცვლილებების ჩაგდებასა და მოქალაქეების პროტესტს ამ დრომდე არც პრემიერი გიორგი გახარია გამოხმაურებია. 24 საათზე მეტია გასული მას შემდეგ, რაც უმრავლესობის დეპუტატებმა პროპორციულ საარჩევნო სისტემაზე გადასვლას მხარი არ დაუჭირეს.

პროპორციულ საარჩევნო სისტემაზე პოზიცია პრემიერმა გუშინ, 14 ნოემბერს კენჭისყრამდე ცოტა ხნით ადრე დააფიქსირა. მთავრობის სხდომაზე გახარიამ თქვა, რომ პროპორციული არჩევნები ქვეყნის დემოკრატიული განვითარების აუცილებელი ნაბიჯია.

"პროპორციული არჩევნები ნულოვანი ბარიერით იყო ჩვენი პოლიტიკური გუნდის კეთილი ნება და გადაწყვეტილება, რომელიც ერთმნიშვნელოვნად იყო გამოძახილი დემოკრატიული პროცესების ქვეყანაში განვითარების დასაჩქარებლად", — განაცხადა პრემიერმა მთავრობის სხდომაზე.

პრემიერის ბრიფინგიდან ორ საათში პარლამენტმა საკონსტიტუციო ცვლილებები ჩააგდო. კანონპროექტის მისაღებად 113 ხმა იყო საჭირო, თუმცა 101 მიიღო. 3 დეპუტატი კანონპროექტის წინააღმდეგი იყო, სხვებმა კი თავი შეიკავეს.

ამის გამო უმრავლესობა 11-მა დეპუტატმა დატოვა. ესენი არიან: თამარ ჩუგოშვილი, თამარ ხულორდავა, სოფიო ქაცარავა, გიორგი მოსიძე, დიმიტრი ცქიტიშვილი, ზაზა ხუციშვილი, მარიამ ჯაში, გიორგი ბეგაძე, ზვიად ძიძიგური, ნინო გოგუაძე, გიგა ბუკია.