ირაკლი კობახიძემ თავისი პარტიის დამფუძნებლის, ბიძინა ივანიშვილის მსგავსად საზოგადოებრივი მაუწყებლის აჭარის ტელევიზიის დისკრედიტაცია სცადა. მან დღეს, 14 ნოემბერს ტელევიზიის მთავარი საინფორმაციო გამოშვების წამყვანს, თეონა ბაკურიძეს პირდაპირ ეთერში მოუწოდა "გაემიჯნოს ნაციონალურ მოძრაობას".

კობახიძე ჟურნალისტის იმ რეპლიკამ გააღიზიანა, რომელიც არჩევნების პროპორციულ წესზე გადასვლასთან დაკავშირებით დეპუტატის ნათქვამს შეეხებოდა.

ჟურნალისტი: რომ არ ვიცოდე კანონპროექტს დაუჭირეთ მხარი, ვიფიქრებდი, რომ წინააღმდეგი ხართ პროპორციული სისტემის...

ირაკლი კობახიძე: არ გინდათ სპეკულაციები... თქვენ მოგიწოდებთ გაემიჯნეთ ნაციონალურ მოძრაობას.

ჟურნალისტი: ვის მოუწოდებთ, აჭარის ტელევიზიას?

ირაკლი კობახიძე: არა პირადად თქვენ.

ჟურნალისტი: რაში დაინახეთ, რომ ნაციონალურ მოძრაობასთან ვარ აფილირებული?

ირაკლი კობახიძე: ყველაფერში... ეს იყო სიმწრის ღიმილი...

"ეს არ არის პირველი შემთხვევა, როცა ასეთი დისკრედიტაციის მცდელობა იყო, მსგავსი განცხადება ბიძინა ივანიშვილმაც გააკეთა", — თქვა თეონა ბაკურიძემ ირაკლი კობახიძის ჩართვის დასრულების შემდეგ.