საქართველოს განათლების, მეცნიერების, კულტურისა და სპორტის მინისტრად მიხეილ ჩხენკელი დააბრუნეს. შესაბამის ბრძანებას პრემიერ-მინისტრმა გიორგი გახარიამ ხელი დღეს მოაწერა. მიხეილ ჩხენკელი დღემდე იყო საქართველოს პრემიერ-მინისტრის მრჩეველი განათლების საკითხებში.

განათლების მინისტრის თანამდებობა ვაკანტური მას შემდეგ გახდა, რაც მიხეილ ბატიაშვილი გადადგა.

პრემიერის მრჩევლობამდე განათლების მინისტრი იყო. ის თანამდებობაზე 2017 წლის 13 ნოემბერს დაინიშნა და ყველაზე მალე, 8 თვეში თანამდებობა დაატოვებინეს. განათლების მინისტრობამდე მიხეილ ჩხენკელი თბილისის სახელმწიფო უნივერსიტეტის პრორექტორი იყო.

მიხეილ ჩხენკელის მინისტრობის დროს ხორავას ქუჩის ტრაგედია მოხდა, რამაც სკოლებში ბულინგისა და ძალადობის პრობლემა გამოააშკარავა. მიხეილ ჩხენკელს ამ მიმართულებითაც ჰქონდა ინიციატივები, მისი მინისტრობის დროს მანდატურის რეფორმაც განხორციელდა.