ლონდონის მერის არჩევნებში 45 წლის სადიქ ხანმა გაიმარჯვა. მან კონსერვატორი მეტოქე ზაკ გოლდსმიტი დაამარცხა და ქალაქის პირველი მუსლიმი მერი გახდა.

ბორის ჯონსონისა და კენ ლივინგსტონის შემდეგ ხანი ლონდონის მესამე მერია.

ლონდონის მერის თანამდებობა 2000 წელს დიდი ლონდონის მმართველობის აქტის შედეგად შეიქმნა.

მანამდე ქალაქს დიდი ლონდონის საბჭო მართავდა.

სადიქ ხანი პაკისტანელი ემიგრანტების ოჯახში დაიბადა, ის სამხრეთ ლონდონში იზრდებოდა თავის 7 და-ძმასთან ერთად. მისი მამა ავტობუსის მძღოლი, ხოლო დედა მკერავი იყო.

15 წლის ასაკში სადიქი ლეიბორისტულ პარტიაში გაწევრიანდა. თინეიჯერობაში დანტისტობა უნდოდა, ამიტომ სკოლაში მათემატიკასა და საბუნებისმეტყველო მეცნიერებებს განსაკუთრებულ ყურადღებას უთმობდა და მაღალ ნიშნებზე სწავლობდა.

სკოლის დამთავრების შემდეგ ჩრდილოეთ ლონდონის უნივერსიტეტში ჩააბარა იურიდიულ ფაკულტეტზე. სწავლის დამთავრებისთანავე თავისი პროფესიით მუშაობა იურიდიულ ფირმა Christian Fisher-ში დაიწყო. აქ მუშაობის მხოლოდ 3 წლის შემდეგ, 27 წლის ასაკში, ის კომპანიის პარტნიორი გახდა და ფირმას Christian Khan დაერქვა.

2004 წელს მან სამსახური დატოვა და 2005 წელს ლეიბორისტული პარტიიდან პარლამენტის წევრი გახდა. საპარლამენტო მოღვაწეობის პერიოდში ხანი, ძირითადად, ადამიანის უფლებებისთვის ბრძოლაში იყო ჩართული.

გამარჯვების შემდეგ ახალმა მერმა ამომრჩეველს მიმართა და განაცხადა, რომ ის ყველა ლონდონელის მერი იქნება და დედაქალაქში დამკვიდრებული უთანასწორობის წინააღმდეგ იბრძოლებს.