სახალხო დამცველი, ნინო ლომჯარია აღნიშნავს, ოჯახში ძალადობას არ აქვს სოციალური სტატუსი, ასაკი, რელიგიადა მისი მსხვერპლი შეიძლება გახდეს ყველა. ასე ეხმაურება ის პარლამენტის დეპუტატის, სოფო კილაძის განცხადებას, რომელმაც თქვა, რომ ყოფილმა ქმარმა მასზე ფსიქოლოგიურად იძალადა.

ომბუდსმენი ამბობს, რომ ყველა ქალმა უნდა ამოიღოს ხმა ძალადობის დროს და მისცეს სხვებს მაგალითი.

"ქალმა საჯაროდ ისაუბროს მის მიმართ ჩადენილ ძალადობაზე ჩვენ საზოგადოებაში ძალიან, ძალიან რთულია, ხოლო საჯარო პირმა, პოლიტიკოსმა და ცნობადმა სახემ — 10 000-ჯერ უფრო რთული და ძალიან დიდ გამბედაობას მოითხოვს... სირცხვილი არ არის, იყო მსხვერპლი, არც მსხვერპლის "ბრალია" იყოს მსხვერპლი. სახელმწიფო იმიტომ არსებობს, რომ უნდა დაგვიცვას ასეთ ვითარებაში, საზოგადოება გვერდით უნდა დაუდგეს მათ", — აღნიშნავს ლომჯარია.

სოფო კილაძემ დღეს, 5 ნოემბერს თქვა, რომ ყოფილმა ქმარმა მასზე ფსიქოლოგიურად იძალადა. მისი ყოფილი ქმრის მიმართ შემაკავებელი ორდერი გაიცა.