დეა გოშხეთელიანის ყოფილ ქმარს, რომელიც სასჯელს ყოფილ ცოლსა და მის მამაზე ძალადობისთვის იხდიდა, სააპელაციო სასამართლომ შემაკავებელი ორდერი გაუუქმა. ამის შესახებ თავად დეა გოშხეთელიანი მოუყვა On.ge-ს.

მისი თქმით, სასამართლოს მსგავსი გადაწყვეტილება საფრთხეს უქმნის მის სიცოცხლეს, რადგან მისი ყოფილი ქმარი სწორედ მასზე ძალადობისთვის დააკავეს. გოშხეთელიანი განმარტავს, რომ შემაკავებელ ორდერთან დაკავშირებით სააპელაციო სასამართლოს განჩინება არ საჩივრდება და შესაბამისად, დაუცველი რჩება.

"ჩემი სიცოცხლე და უსაფრთხოება, იმ მოსამართლის კისერზე იყოს, რომელმაც შემაკავებელი ორდერი გააუქმა... სააპელაციო სასამართლოს მოსამართლე ილონა თოდუა... მე თუ რამე დამემართა, იცოდეთ, ვინ შეუწყო ხელი ამ ყველაფერს!.." — დაწერა გოშხეთელიანმა ფეისბუქში.

დეა გოშხეთელიანი ოჯახში ძალადობის მსხვერპლი ქალია. ქმრის, მიტოვება მხოლოდ ორწლიანი თანაცხოვრების შემდეგ შეძლო, თუმცა ძალადობა დაშორებასთან ერთად არ შეწყვეტილა. დაშორებიდან 7 თვის შემდეგ, ყოფილმა ქმარმა დეას და დეას მამას, მათ სახლში სცემა. ამ საქმეზე დეა გოშხეთელიანის ყოფილი ქმარი გრიგოლ ბაკურაძე ქუთაისის საქალაქო სასამართლომ დამამძიმებელ გარემოებაში ჩადენილ დანაშაულში დამნაშავედ ცნო და სასჯელად 1 წლითა და 9 თვით თავისუფლების აღკვეთა განუსაზღვრა.