ცაგერისა და ლენტეხის მიტროპოლიტ სტეფანეს არ სჯერა, რომ დეკანოზი გიორგი მამალაძე შორენა თეთრუაშვილის წინააღმდეგ რამეს გეგმავდა. გარდა ამისა, მას არ სჯერა, რომ დეკანოზი მარტო იყო.

"მაგრამ არაფრის დამტკიცება არ შემიძლია. ის, რაც ვნახეთ, ამ ვერსიას არ ამაგრებს", — განაცხადა მეუფე სტეფანემ გადაცემა პირველებში.

31 ოქტომბერს სინოდის სხდომამ ერთსულოვნად მიიღო გადაწყვეტილება, რომ დეკანოზ გიორგი მამალაძის შეწყალების შუამდგომლობით პრეზიდენტს მიმართოს.

ციანიდის საქმე

დეკანოზი გიორგი მამალაძე 2017 წლის 10 თებერვალს თბილისის საერთაშორისო აეროპორტში დააკავეს. დეკანოზის დაკავების შესახებ ინფორმაცია პროკურატურამ 13 თებერვალს გაავრცელა. მას პატრიარქის მდივან-რეფერენტის, შორენა თეთრუაშვილის მკვლელობის მომზადება ედება ბრალად. შორენა თეთრუაშვილი, ილია მეორესთან ერთად, აღნიშნულ პერიოდში ბერლინში იყო, სადაც პატრიარქი მკურნალობდა.

დეკანოზი გიორგი მამალაძე სასამართლომ დამნაშავედ სცნო და მას შორენა თეთრუაშვილის განზრახ მკვლელობის მომზადებისა და იარაღის უკანონო შენახვა-ტარებისთვის ცხრაწლიანი პატიმრობა მიუსაჯა.

თბილისის სააპელაციო სასამართლომ დეკანოზ გიორგი მამალაძის მიმართ გამოტანილი განაჩენი ძალაში დატოვა, უზენაესმა სასამართლომ კი დაუშვებლად სცნო.