პრემიერ-მინისტრ გიორგი გახარიას თქმით, ისინი ვერ ეკლესიაში და ვერც სახელმწიფო ვერავის მისცემენ უფლებას, რომ დესტრუქციული ქმედებებით ქვეყნის მომავალი რისკის ქვეშ დააყენონ. ამის შესახებ პრემიერმა მთავრობის სხდომის დაწყების წინ პატრიარქის მიმართ მეუფე პეტრეს ბრალდებაზე საუბრისას განაცხადა.

გახარიამ სინოდის სხდომის შემდეგ განვითარებული მოვლენები "20 ივნისის რევოლუციურ სცენარს" დაუკავშირა:

"რა თქმა უნდა, გარკვეული ჯგუფები, რომელთაც არ სურთ ქვეყნის წყნარი მშვიდობიანი განვითარება, ცდილობენ სხვადასხვა სახით პროვოკაციებით ზიანი მიაყენონ ჩვენი ქვეყნის ხვალინდელ დღეს. ასეთი მცდელობა ჩვენ რამდენიმე ხნის წინ ვნახეთ, როდესაც რევოლუციურ სცენარს გვიგეგმავდნენ მთავრობასთან და სახელმწიფოსთან მიმართებაში, დღეს როგორ ჩანს, გადაწყვიტეს, დესტრუქციული ქმედებებით შეიტანონ გაურკვევლობა ეკლესიაში".

მაშინ, როცა მეუფე პეტრეს განცხადება გიორგი გახარიამ ეკლესიასა და სახელმწიფოზე შეტევად შეაფასა, პატრიარქის გადაყენებაზე ეპისკოპოს იაკობის განცხადებებს ხელისუფლების წევრებმა არასერიოზული უწოდეს. მეუფე იაკობი ამბობდა, რომ ყოფილი პრემიერის გიორგი კვირიკაშვილის კაბინეტში "ეჩალიჩებოდნენ პატრიარქ ილია მეორის გადაყენებაზე და შიო მუჯირის პატრიარქად არჩევაზე". მისი თქმით, შეხვედრას ესწრებოდა სამი ადამიანი: ვახტანგ გომელაური, გიორგი გახარიას და გიორგი კვირიკაშვილი.

მაშინ პარლამენტში ფრაქცია ქართული ოცნება — დემოკრატიული საქართველოს ლიდერმა, მამუკა მდინარაძემ განაცხადა, რომ სეკულარულ სახელმწიფოში ეკლესია და სახელმწიფო ერთმანეთის საქმეებში არ უნდა ჩაერიოს.