პარლამენტის პლენარულ სხდომაზე მმართველი პარტიის დეპუტატმა, მამუკა მდინარაძემ და პატრიოტთა ალიანსის ლიდერმა, ირმა ინაშვილმა იკამათეს. მდინარაძემ განაცხადა, რომ ინაშვილი არასწორ სტატისტიკას იშველიებს, როდესაც ქართული ოცნების მხარდამჭერების რიცხვზე საუბრობს. მისი თქმით, ეს რიტორიკა ნაციონალური მოძრაობისა და ევროპული საქართველოს განცხადებებს გავს.

"საერთო მესიჯი გამოგდით. მოსყიდვას ამბობს თქვენც და ნაცებიც. დაშინებას ამბობთ თქვენც და ნაცებიც. რაც არ უნდა გაბრაზდეთ ეხლა არის სიმართლე. კაია მე და თქვენ რომ ვჩხუბობთ, რაღაცეებს ვეღარ დაგვაბრალებენ", — უთხრა მდინარაძემ ინაშვილს.

პასუხად დარბაზში ირმა ინაშვილის ყვირილი ისმოდა. "არ გრცხვენიათ?" — იმეორებდა ის.

მანამდე ინაშვილმა ქართული ოცნების დეპუტატებს მოუწოდა თავი შეეკავებინათ "წინასწარ პროცენტების ბრახა-ბრუხისგან". მისი თქმით, დეპუტაები უნდა დაელოდონ რეალობას, რომელიც არჩევნების შედეგებზე დადგება. მისივე თქმით, ეს რელობა ქართულ ოცნებას მოკავშირეების ყოლას სანატრელად უქცევს იმის ფონზე, რომ ახლა უარზე არიან ვინმესთან კოალიციაში შევიდნენ.