24-26 ოქტომბერს თბილისში ტარდება საერთაშორისო კონფერენცია ეთნოკულტურული მრავალფეროვნება და ინტერკულტურული კომუნიკაცია საქართველოში. 24 ოქტომბერს კონფერენცია თბილისის სახელმწიფო უნივერსიტეტში გაიხსნა, 25 ოქტომბერს კი ეროვნულ ბიბლიოთეკაში გაგრძელდა.

საერთაშორისო კონფერენცია თბილისის სახელმწიფო უნივერსიტეტის ჰუმანიტარულ მეცნიერებათა ფაკულტეტის, საქართველოს პარლამენტის ეროვნული ბიბლიოთეკის, საქართველოს საბიბლიოთეკო ასოციაციისა და საქართველოს ანთროპოლოგთა ასოციაციის ორგანიზებით და შოთა რუსთაველის საქართველოს ეროვნული სამეცნიერო ფონდის ფინანსური მხარდაჭერით იმართება.

კონფერენციაში მონაწილეობა მიიღეს ეროვნული ბიბლიოთეკის დირექტორმა გიორგი კეკელიძემ და დირექტორის მოადგილემ მირიან ხოსიტაშვილმა.

ეროვნული ბიბლიოთეკის დირექტორის მოადგილემ მირიან ხოსიტაშვილმა ღონისძიებაზე განაცხადა, რომ კონფერენცია იკვლევს ეთნიკურ და რელიგიურ უმცირესობებს ქვეყანაში, მათ მდგომარეობას, თანაარსებობას, ურთიერთობასა და ურთიერთობის სამომავლო პერსპექტივებს.

კონფერენციაში ასევე მონაწილეობას იღებენ კანადის, თურქეთის, გერმანიის, პოლონეთის, ფინეთის, სომხეთის სამეცნიერო ცენტრების წარმომადგენლები.

ინტერკულტურული კომუნიკაციის საკითხი თანამედროვე მსოფლიოში მიმდინარე პროცესების (გლობალიზაცია, მიგრაციები, კონფლიქტები) გამო განსაკუთრებულ დატვირთვას იძენს. საქართველო ისტორიულად გამორჩეული ქვეყანაა თავისი მრავალფეროვნებით, რამაც განაპირობა მშვიდობიანი თანაცხოვრების ტრადიციული სისტემებისა და ჯგუფთაშორისი საკომუნიკაციო არხების ჩამოყალიბება; განსაკუთრებული ეთნოგრაფიული რეალიებისა და ქცევის მოდელების განვითარება.

კონფერენციის ფარგლებში ეროვნული ბიბლიოთეკის დირექტორის მოადგილემ მირიან ხოსიტაშვილმა პამუკალეს უნივერსიტეტის პროფესორი ფაჰრიე ბაირამი და მონრეალის უნივერსიტეტის პროფესორი ქევინ თიუითი ქართული კულტურის კვლევის საქმეში შეტანილი წვლილისთვის საპატიო სიგელებითა და ეროვნული ბიბლიოთეკის მედლით დააჯილდოვა.