სახელმწიფო უსაფრთხოების სამსახურის უფროსს, გრიგოლ ლილუაშვილს ჰგონია, რომ გირჩის რელიგიის, ბიბლიური თავისუფლების მღვდელმსახურობა დეზერტირობას ნიშნავს. გადაცემა SWOT ანალიზში ლილუაშვილმა თქვა, რომ საკანონმდებლო ხარვეზი საშუალებას იძლევა, რომ "ჯანმრთელმა, ქართველმა, ახალგაზრდა კაცმა თავი აარიდოს სამშობლოს წინაშე ვალის პირნათლად მოხდას".

"ჩვენს ახალგაზრდებს წუნს ვერ დაუდებ განათლებაში, წუნს ვერ დაუდებ გონებრივ შესაძლებლობასა და განვითარებაში, თუმცა მათ აკლიათ ეს ეროვნულობის განცდა. სამწუხაროდ, შეძლებული ფენის ოჯახებიდან ნაკლებად ხდება სამხედრო სავალდებულო სამსახურში შვილების გაშვება. ეს ჩვენთან არამოდურად ითლება. როდესაც სამშობლოს ჭირს და სისხლის ღვრების შედეგად გმირები დებენ თავს ქვეყნის სადარაჯოზე, აღმოჩნდება, რომ ეს გმირები არ არიან შეძლებული ოჯახებიდან გამოსულები. ეს არის ჩვენი მენტალური პრობლემა.

ბავშვი, რომელიც ვერასდროს ვერ ემთხვევა საკუთარ დროშას, ბავშვი რომელსაც გააზრებული არ ექნება ცხოვრების განმავლობაში საქართველოს ჰიმნი და ღირებულებები, რაც ქვეყნის ატრიბუტიკასასთან გამოხატვით შეიძლება შეაგრძნობინო, უცხო იქნება ჩვენი მომავალი თაობისთვის", — განაცხადა სახელმწიფო უსაფრთხოების სამსახურის ხელმძღვანელმა.

2017 წელს პარტია გირჩმა რელიგიური ორგანიზაცია დააფუძნა, ვინაიდან კანონი სასულიერო პირებს სამხედრო სამსახურის გადავადების საშუალებას აძლებს. ორგანიზაცია ბიბლიური თავისუფლება სასულიერო პირებს აკურთხებს და შესაბამის ცნობასაც გასცემს. სასულიერო წოდების მქონე ახალგაზრდები კი, შესაბამისი უწყებებისგან სავალდებულო სამხედრო სამსახურის გადავადებას ითხოვენ და მიზანსაც აღწევენ, რადგან კანონში არსებული ჩანაწერი მათ ამის საშუალებას აძლევს.