თემირლან მაჩალიკაშვილის ოჯახის ადვოკატი, მარიამ კუბლაშვილი ამბობს, რომ პანკისის სპეცოპერაციის საქმეზე სუს-ის ყოფილი ხელმძღვანელისა და მოქმედი შს მინისტრის, ვახტანგ გომელაურისა და მისი ყოფილი მოადგილის, სოსო გოგაშვილის ჩვენებები წაიკითხა.

მისი თქმით, გომელაური, გოგაშვილი და ანტიტერორისტული დეპარტამენტის დირექტორი ირაკლი ჩიმაკაძე მიმდინარე წლის აგვისტოში დაკითხეს. როგორც ადვოკატი გადაცემა ღამის მთავარში ამბობს, პასუხისმგებელი პირები გაურბიან კითხვებს თუ ვინ გასცა თემირლან მაჩალიკაშვილისთვის სროლის ბრძანება და აღნიშნავენ, რომ ეს ერთობლივი გადაწყვეტილება იყო.

გომელაურის ჩვენებაზე დაყრდნობით ადვოკატი ამბობს, რომ პანკისის სპეცოპერაცის სპეციალური ოპერაციების სამსახურის იმდროინდელი დირექტორი ხელმძღვანელობდა. ასევე, ადგილზე იმყოფებოდა სახელმწიფო უსაფრთხოების სამსახურის ანტიტერორისტული დეპარტამენტის დირექტორის მოადგილე.

მარიამ კუბლაშვილი ყვება, რომ ვახტანგ გომელაურის ჩვენება 2017 წლის ისნის სპეცოპერაციის გახსენებით იწყება და საუბრობს იმაზეც, თუ რატომ გახდა საჭირო პანკისში სპეცოპერაციის შუაღამით დანიშვნა:

"გომელაური ამ კითხვაზე პასუხობს, რომ ეხება სენსიტიურ თემას, პანკისის ხეობას, საზოგადოებისა და მოსახლეობის შესაძლო შიშს, თუ სპეცოპერაცია იქნებოდა დღისით. აქვე განმარტავს, რომ საბოლოოდ ჯამში, საგამოძიებო ჯგუფისთვის ძალისმიერი უზრუნველყოფა მათი მხრიდან დაევალა სახელმწიფო უსაფრთხოების სამსახურის სპეციალური ოპერაციების დეპარტამენტს ე.წ. სპეცრაზმს, უშუალოდ შავნაბადას. [გომელაური ამბობს] თუ იქნებოდა დღის განმავლობაში დაგეგმილი სპეცოპერაცია შესაძლოა მოსახლეობის მხრიდან ყოფილიყო საფრთხე, პოლიციაზე წინააღმდეგობის გაწევა ან რაიმე სახის დემონსტრაცია".

რაც შეეხება სოსო გოგაშვილს, კუბლაშვილი ამბობს, რომ ის სპეცოპერაციის დღეს პანკისში ყოფნას კატეგორიულად უარყოფს. გარდა ამისა ადვოკატი ამბობს, რომ ისინი არ გაცნობიან თვითონ მსროლელის, სპეციალური რაზმის სამსახურის თანამშრომლის ჩვენებას.

2017 წლის 21-22 ნოემბრის ისნის სპეცოპერაციის შედეგად სუს-მა დააკავა დანაშაულებრივი ჯგუფის ერთი პირი და სამი წევრის ლიკვიდირება მოახდინა. რამდენიმე კვირის შემდეგ, 26 დეკემბერს, პანკისში, ახმედ ჩატაევთან და მის თანამზრახველებთან კავშირის ბრალდებით რუსლან ალდამოვთან ერთად ოთხი პირი დააკავეს. სახელმწიფო უსაფრთხოების სამსახურის ინფორმაციით, თემირლან მაჩალიკაშვილმა დაკავებისას წინააღმდეგობის გაწევა და ხელყუმბარის გამოყენება სცადა, რის გამოც სპეცრაზმელებმა მას ესროლეს. მაჩალიკაშვილმა სასიკვდილო დაზიანება თავის არეში მიიღო.