BBC-ის ცნობით, პარიზის ტერაქტის მოწყობაში მთავარი ბრალდებულის სალაჰ აბდესლამის დაცვაზე ადვოკატებმა უარი თქვეს.

გამოცემის ცნობით, მისი ერთ-ერთი ადვოკატი ფრანკ ბერტონი ამბობს, რომ აბდესლამი კვლავ დუმილის უფლებას იყენებს და სწორედ ამიტომ აღარ დაიცავენ მას.

გასული წლის ნოემბერში, პარიზის ტერაქტის დროს ბარებზე, რესტორნებსა და საკონცერტო დარბაზზე თავდასხმისას, 130 ადამიანი დაიღუპა. ტერაქტზე პასუხისმგებლობა ე.წ. ისლამურმა სახელმწიფომ აიღო.

სალაჰ აბდესლამი ტერაქტიდან რამდენიმე თვეში ბრიუსელში დააკავეს და მისი საფრანგეთში ექსტრადირებიდან დღემდე, დუმილის უფლებით სარგებლობს. საფრანგეთის ციხეში აბდესლამს 24 საათის განმავლობაში აკვირდებიან. გამოძიება ჯერ კიდევ ადგენს თუ რა როლი ჰქონდა მას ტერაქტის მოწყობისას.

BBC-ის ინფორმაციით, კანონით გამოძიების მიმდინარეობისას ადვოკატის საჭიროება არ არის, თუმცა სასამართლო პროცესზე აუცილებელია.