დისნეიმ მხატვრული ფილმის, ლედი და მაწანწალას ახალი ტრეილერი გამოაქვეყნა. სურათი 1955 წლის ანიმაციის ადაპტაციაა. ახალ ტრეილერში ძაღლებს სპაგეტის ჭამისას ერთმანეთი უყვარდებათ.

მაწანწალას ჯასტინ ტერუ, ხოლო ლედის — ტესა ტომპსონი ახმოვანებს. ფილმში მაშველი ძაღლები მონაწილეობენ. გამხმოვანებლებს შორის ასევე არიან ჟანელ მონე და სემ ელიოტი.

სცენარის მიხედვით, ოჯახიდან წამოსული კოკერ-სპანიელი მაწანწალას ხვდება. ისინი ერთად საინტერესო და სახიფათო თავგადასავლებში ეხვევიან და მიუხედავად მათ შორის არსებული განსხვავებისა, ერთმანეთი უყვარდებათ და ოჯახის ღირებულებას თავიდან იგებენ.

ახალ ტრეილერში მაწანწალა თავისი ცხოვრების სტილს გვაცნობს და უმწეო ლეკვებისა და დატყვევებული ლედის მხსნელად გვევლინება.

"ყოველი დღე ახალი თავგადასავალია", — ეუბნება ის ლედის ტრეილერის ბოლოს.

ანიმაცია 1955 წელს გამოვიდა და მაშინვე გახდა ყველასათვის ერთ-ერთი საყვარელი მულტფილმი. ახალი ვერსიის რეჟისორი ჩარლი ბინია.

საყვარელი ძაღლების ცხოვრებაზე გადაღებული ფილმის პრემიერა დისნეის სტრიმინგ სერვისზე, Disney+, 12 ნოემბერს შედგება.

ამავე თემაზე: