თბილისის მერიის განცხადებით, 16 ოქტომბრიდან, ჭავჭავაძის გამზირზე, ვარაზისხევიდან პიქსელის შენობამდე მოძრაობა ორმხრივად აღდგება. მოძრაობა ამ მონაკვეთზე ერთი თვის წინ ცალმხრივად გაიხსნა.

"ეს არ ნიშნავს იმას, რომ სამუშაოები ამ ფენის დაგებით სრულდება. პარალელურად, გავაგრძელებთ პროექტით გათვალისწინებულ სხვა სამუშაოებს, როგორიც არის ბორდიურებისა და ტროტუარების მოწყობა, ელექტროგადამცემი ხაზების მიწის ქვემოთ ჩატანა, განათების ბოძების დაყენება თავისი ლედსანათებით", — თქვა კახა კალაძემ.

მერის თქმით, არაყიშვილის ქუჩიდან რიგის ქუჩამდე არსებულ მონაკვეთზე ასფალტის საფარი მიმდინარე თვის ბოლომდე დაიგება. ჭავჭავაძის გამზირის რეაბილიტაციაზე დედაქალაქის ბიუჯეტიდან 15 000 000 ლარი დაიხარჯება.

რეაბილიტაციისთვის თბილისში, ილია ჭავჭავაძის გამზირის პირველი მონაკვეთი 29 მაისიდან გადაიკეტა. გზის რეაბილიტაციის გარდა, თბილისის მერია გეგმავს ილია ჭავჭავაძის გამზირზე მოაწყოს საფეხმავლო ბილიკები, დააყენოს ახალი განათებები, დაიწყოს გამწვანებითი სამუშაოები და მოაწყოს საავტობუსო ზოლები. მერია ასევე გეგმავს, რომ ჭავჭავაძის გამზირზე ურნები მიწის ქვეშ ჩაიტანოს. სარეაბილიტაციო სამუშაოების მიმდინარეობის პერიოდში დროებით შეცვლილია საზოგადოებრივი ტრანსპორტის მარშრუტები.