პარიზში კიმ კარდაშიანის დაყაჩაღების შესახებ ფილმს გადაიღებენ

2016 წელს პარიზის მოდის კვირეულზე ჩასული სატელევიზიო ვარსკვლავი, კიმ კარდაშიანი მძარცველებმა სასტუმროს ნომერში ტყვედ აიყვანეს და მილიონობით დოლარის ღირებულების ძვირფასეულობა წაართვეს.

ამ ფაქტმა თავის დროზე საერთაშორისო მედიაში დიდი რეზონანსი გამოიწვია და ის არც ხელოვანებს დარჩენიათ შეუმჩნეველი: ცოტა ხნის წინ ფრანგმა მწერალმა და რეჟისორმა, ჟოან სფარმა განაცხადა, რომ ამ ისტორიის შთაგონებით კომიქსი დაწერა. კომიქსის სათაურია მოდის კვირეული და ის საფრანგეთში მარტიდან გაიყიდება.

თუმცა, მხოლოდ ეს არ არის: ჟოან სფარმა ისიც დაამატა, რომ სწორედ თავის მიერ დაწერილი ამ კომიქსის მიხედვით ფილმსაც გადაიღებს. მისი თქმით, ფილმში მთავარი თემა ფემინისტური საკითხები, თანამედროვე პატრიარქატის ანალიზი და ეკონომიკური უთანასწორობა იქნება.

როგორც ცნობილია, ფილმის სიუჟეტი ასაკში შესული მძარცველების ირგვლივ იტრიალებს, რომლებსაც პარიზში სამოგზაუროდ ჩასული ცნობილი ადამიანის გაქურდვა განუზრახავთ. ჯერ-ჯერობით უცნობია, თუ ვინ ითამაშებს ამ ფილმში, თუმცა ის ვიცით, რომ ეს მხოლოდ ფრანგული პროექტი არ იქნება და მასში საერთაშორისო ვარსკვლავებიც მიიღებენ მონაწილეობას.

კინომოყვარულებს ეს სიახლე მსგავსი თემატიკის ერთ გახმაურებულ ფილმს აუცილებლად გაახსენებს: ცნობილმა ამერიკელმა რეჟისორმა, სოფია კოპოლამ 2013 წელს გადაიღო კომედიური ჟანრის ფილმი The Bling Ring, სადაც ასევე მძარცველების გუნდი ცნობილი ადამიანების სახლებს ქურდავენ.