თბილისის მერის კახა კალაძის განმარტებით, მას არ უგულისხმია, რომ ვისაც გაძვირებული ტაქსისთვის ფული არ ეყოფა, მეტროთი ან ავტობუსით უნდა იარონ. მისი თქმით, ეს არასწორი კონტექსტია. მისივე თქმით, 7 წელია პოლიტიკაშია და მანამდე სპორტში იყო, ამიტომ "ცხადია, ასეთ სისულელეს" არ იტყოდა.

"მე ვსაუბრობდი მაშინ დეკემბერში და ახლაც სატრანსპორტო პოლიტიკაზე, რომელიც რამდენიმე კომპონენტისგან შედგება. მთავარი ამოცანა რა არის ჩვენთვის? რომ საზოგადოებრივი ტრანსპორტი ისეთი პოპულარული გახდეს, რომ ადამიანებს საკუთარ ავტომობილებზე ვათქმევინოთ უარი.

რაც შეეხება ტაქსს, მას ყავს თავისი კლიენტი. თუმცა, მე დარწმუნებული ვარ ამ პროექტის და სატრანსპორტო პოლიტიკის ფარგლებში, რომელიც წამოვიწყეთ და საკმაოდ ამბიციურია, სერიოზულ კონკურენციას გავუწევთ ტაქსებს. გვეყოლება ახალი ავტობუსები, რომელსაც ექნება სპეციალური ზოლები ქალაქში, მოწყობილი იქნება ინფრასტრუქტურა... აი, ეს იყო ჩემი ნათქვამი და კონტექსტიდან ამოიღეს იმ თვალსაზრისით, რომ თუ ტაქსით მგზავრობა არ გინდათ აგერ იარეთ ავტობუსით ან ჩადით მეტროში", — განმარტა კალაძემ გადაცემა რეაქციაში.

დღეს, 8 ოქტომბერს ჟურნალისტებთან საუბრისას კალაძემ განაცხადა, რომ როდესაც მოქალაქე უსაფრთხო და სუფთა ტაქსით მგზავრობს მომავალში ტარიფის ზრდა მოსალოდნელია.

"თუ ვინმესთვის ეს პრობლემა იქნება იქნება შესაბამისად ახალი ავტობუსები, რითაც შეეძლებათ გადაადგილება, იქნება მეტრო, განახლებული სადგურებით და რეაბილიტირებული ვაგონებით", — სწორედ ამ ციტატას გამოეხმაურა კალაძე.

პირველი ოქტომბრიდან თეთრი ფერის ტაქსების რეგულაცია ძალაში შევიდა. თბილისის მერიის ახალი რეგულაციით, ტაქსის მომსახურებას კლიენტებს ვეღარ გაუწევენ სამკარიანი და მარჯვენასაჭიანი ავტომობილები. გარდა ამისა, ტაქსით მომსახურების შესაბამისი ლიცენზიის გარეშე განხორციელება 200 ლარით ჯარიმდება.

მერიის რეფორმებს ტაქსის მძღოლების აქციები მოჰყვა, ისინი ამბობდნენ, რომ თეთრად გადაღებვის შემთხვევაში ხარჯი მერიის მიერ გადაცემული ვაუჩერით სრულად ვერ იფარებოდა. გარდა ამისა, მათი განმარტებით, გადაღებილი მანქანის ფასი გადაუღებავთან შედარებით დაბალია. ამის შემდეგ მერიამ მძღოლებს გადაღების ნაცვლად ფირის გადაკვრა შესთავაზა.