პარლამენტის გენდერული თანასწორობის საბჭო ერთ კვირაზე მეტია არ გამოხმაურებია პარლამენტში ეკა ბესელიას მიმართ დისკრედიტაციის მცდელობას. შემთხვევა 26 სექტემბერს მოხდა, მოსამართლეების მოსმენის დროს უმრავლესობის დეპუტატმა, ვანო ზარდიაშვილმა ახსენა "ბესელიას მორალი". სავარაუდოდ, დეპუტატი ამ სიტყვებში პირადი ცხოვრების ამსახველ ფარულ ჩანაწერებზე მიანიშნებდა.

გენდერული საბჭოს მდივანი მარიამ ჯაჯანიძე კითხვაზე, რა პოზიცია აქვს საბჭოს და როდის გაავრცელებს განცხადებას, პასუხობს, რომ ამ საკითხზე თავმჯდომარემ, თამარ ჩუგოშვილმა უკვე ისაუბრა.

"გენდერული საბჭოს პოზიცია წერილობით ამ შემთხვევაზე არ გამოქვეყნებულა. როგორც თამარ ჩუგოშვილმა თქვა, საბჭოს შემდეგ სხდომაზე მოვიწვევთ ეკა ბესელიას და ვკითხავთ, რა მოლოდინები აქვს, რაში ხედავს საბჭოს როლს", — თქვა On.ge-სთან საუბრისას მარიამ ჯაჯანიძემ.

პარლამენტის გენდერულ საბჭოს განცხადების გასავრცელებლად რამდენიმე დღე დასჭირდა მაშინაც, როცა დეპუტატ ეკა ბესელიას პირადი ცხოვრების ამსახველი კადრები გავრცელდა. პარლამენტის გენდერული თანასწორობის საბჭოს 17 წევრიდან 14 ქალია, მათ შორისა თავად ეკა ბესელიაც.