ევროპული საქართველოს დეპუტატის, ირმა ნადირაშვილის განცხადებით, პრეზიდენტმა ეროვნული ბანკის საბჭოს წევრად თავისი საპარლამენტო მდივნის, დიმიტრი გაბუნიას პარტნიორი, გიორგი მიროტაძე წარადგინა. როგორც ნადირაშვილმა პირველ ოქტომბერს ბრიფინგზე განმარტა, მიროტაძე და გაბუნია პარტნიორები იურიდიულ კომპანიაში არიან.

გარდა ამისა, ნადირაშვილი ამბობს, რომ გაბუნიასთან პარტნიორობის გამო გიორგი მიროტაძე პროკურატურაში შეწყალების საქმეზე გამოკითხეს. დეპუტატი აცხადებს, რომ გაბუნიას პრეზიდენტის ადმინისტრაციაში გავლენები აქვს.

"ბატონი გაბუნია პირდაპირ ახდენს გავლენას პრეზიდენტზე. მას შეუძლია, საკუთარი კანდიდატურები პრეზიდენტს თავს მოახვიოს. იმის გამო, რომ ბატონი გაბუნია აშკარად დაკავებულია პოლიტიკური ნეპოტიზმით, კიდევ ერთხელ გვინდა პროკურატურას მივმართოთ, კარგად გამოიძიოს ამ ადამიანის გავლენები პრეზიდენტის ადმინისტრაციაში", — განაცხადა ირმა ნადირაშვილმა.

პრეზიდენტის ადმინისტრაციაში დიმიტრი გაბუნიას გავლენებზე ევროპულ საქართველოს აქამდეც უსაუბრია. 18 სექტემბერს ირმა ნადირაშვილმა განაცხადა, რომ პრეზიდენტის ადმინისტრაციაში შეწყალებასთან დაკავშირებული საქმეები უშუალოდ საპარლამენტო მდივნის, დიმიტრი გაბუნიას შუამდგომლობით გვარდება. 20 სექტემბერს კი პროკურატურამ სალომე ზურაბიშვილის მიერ პატიმრების შეწყალების საქმეზე გამოძიება დაიწყო და გამოკითხვაზე ნადირაშვილი დაიბარა.

ამ ბრალდებასთან დაკავშირებით გაბუნიამ თქვა, რომ შეწყალების საქმესთან მას კავშირი არ აქვს. მოგვიანებით კი განაცხადა, რომ შესაწყალებელთა სია ადმინისტრაციის უფროსის მოადგილემ შეადგინა. ადმინისტრაციიდან ამ საქმეზე უკვე გამოკითხეს პრეზიდენტის საპარლამენტო მდივანი, დიმიტრი გაბუნია, პრეზიდენტის ადმინისტრაციის უფროსის მოადგილე, ანგი ხუციშვილი და კიდევ ხუთი თანამშრომელი.

პატიმრების შეწყალება

პრეზიდენტის მიერ შეწყალების სისტემის გამჭვირვალობასთან დაკავშირებით ბოლო რამდენიმე კვირაში არაერთი კითხვა დაისვა. 17 სექტემბერს ცნობილი გახდა, რომ სალომე ზურაბიშვილმა მარიამობას მკვლელობაში მსჯავრდებული კიდევ ერთი პირი, ზურაბ ნადირაძე შეიწყალა. მის ექსტრადიციას საქართველოს მთავრობა 23 წლის განმავლობაში ითხოვდა.

მანამდე ინფორმაცია გავრცელდა, რომ ზურაბიშვილმა 18 წლის დათო ოთხმეზურის მკვლელობისთვის გასამართლებული ასლან ბეჟანიძე შეიწყალა. ბეჟანიძე 2016 წლის მარტში დააკავეს და 11 წელი ჰქონდა მისჯილი.

ამასთანავე, პრეზიდენტმა შეიწყალა პირი, რომელიც ბათუმში პოლიციელის, თარაშ მუკბანიანის მკვლელობისთვის იყო მსჯავრდებული. პოლიციელის მკვლელობისთვის რამაზ დევაძეს 2015 წლის 18 სექტემბერს 12 წლით პატიმრობა მიუსაჯეს.

რამდენიმე კვირის წინ თვითონ სალომე ზურაბიშვილმა მაშინ გადაწყვეტილების განმარტებაზე უარი განაცხადა. მისი თქმით, შეწყალება პრეზიდენტის დისკრეციული უფლებაა.

"ეს უცებ გახდა რაღაც სალაპარაკო პრობლემა იმ დროს, როცა აქ ამდენი არის პოზიტივზე სალაპარაკო. ესეც დიდად არ მიკვირს. თუ რამე განცხადება არის უფრო დეტალური გასაკეთებელი, ეს უნდა გაკეთდეს თბილისში", — თქვა მაშინ ზურაბიშვილმა.

პრეზიდენტის გადაწყვეტილებას კრიტიკით შეხვდნენ როგორც ხელისუფლების, ისე ოპოზიციის წარმომადგენლები. ამასთანავე, მკვლელობისთვის მსჯავრდებულთა შეწყალება მიუღებელი აღმოჩნდა მმართველი პარტიის დეპუტატებისთვის. რამდენიმედღიანი კრიტიკის შემდეგ პრეზიდენტი გამოვიდა ინიციატივით, რომ შეწყალების უფლება დაიხვეწოს. 18 სექტემბერს მან შეწყალებაზე მორატორიუმი გამოაცხადა.